Visibilizando a perspectiva feminista a través da música

As Bibliotecas Municipais sumámonos á campaña impulsada polo Concello Coruna baixo o lema “A por todas. Mulleres sen límites” cun obxectivo claro: #VisibilizarOinvisible poñendo o foco na perspectiva feminista das bibliotecas. 

Imaxe campaña 8M do Concello da Coruña

A través da visibilización da música galega feita por mulleres queremos trasladar o contexto xustificativo da existencia do Día da Muller. E é que a case ninguén se lle escapa xa que o panorama musical galego vive nos últimos anos un auténtico espertar en feminino. Isto supón un elemento fundamental na sociedade galega contemporánea (entre outros moitos) para a construcción da súa identidade nacional. E se por bo camiño imos, a meta non debe ser outra ca de deixar de ser  anecdótico ou curioso que haxa un grupo de rock composto por só rapazas e mesmo que tamén canten en galego.

Elaboramos unha nova lista de distribución na nosa canle de spotity composta por música feita por mulleres da terra, mulleres mediáticas con compromiso feminista coma Sés, Guadi Galego ou Mercedes Peón e que tiveron moito que ver neste rexurdir dos últimos tempos de  grupos e artistas galegas coma as Tanxugueiras, A Banda da Loba, Wöyza ou MJ Pérez entre outras.

Podedes escoitar o último traballo da de Cedeira “Costuras” publicado nun fermoso e orixinal DIGIPACK , a  portada contén unha obra do pintor Ricardo de Barreiro que cada persoa descobre rascando a superficie gris.  Un bo xogo que invita ao comprador do álbum a crear a súa propia versión da mesma. Supón o quinto disco en solitario e segundo a crítica un dos mellores.10 cancións de Guadi Galego e Carlos Abal que viaxan desde mundos asociados á súa infancia ata o presente máis duro e á vez esperanzador, onde a autora amósase tal como é.

Guadi Galego-Costuras

“Fábrica de luz” está firmado por cinco mulleres que mesturan pop, blues, folk, rock e sons tradicionais creando un estilo musical de seu, son A Banda da Loba. “Fábrica de Luz” é un traballo de creación, reflexión e homenaxe en torno á idea de nai entendida nun sentido amplo. A lingua e a terra, son as primeiras nais, fábricas de luz. As creadoras que nos precederon e as que nos acompañan nesta viaxe son tamén fábricas de luz. As nosas nais, as vosas nais, todas as nais son fábricas de luz. Son fogar, tempo e amor incondicional. Son poder, loita e memoria. Son todo o que nos permite ser hoxe tamén fábrica de luz.A Banda da loba recén acaba de presentar “Intempériome”, o primeiro adianto dun EP titulado “Hasme oír” que sairá á rúa a comezos de abril para homenaxear a Xela Arias, a quen se lle adican este ano as Letras Galegas.

Fabrica de Luz (Videoclip oficial)

“Contrapunto” é o segundo traballo de Tanxugueiras co que dan un gran paso cara unha maior madurez tanto musical como persoal e grupal. O disco está composto por dez temas nos que priman a transmisión dun sentimento concreto a través das letras e música.

“Efecto boomerang” está asinado por unha das representantes máis destacadas da canción de autor en Galicia, Silvia Penide, que nos últimos traballos achégase ao pop intimista, co que logra emocionar e cautivar a un público cada vez máis numeroso. Neste disco atopamos unha nova colección de temas sensibles e reflexivos, que nos achegarán, grazas ao boomerang, a recoñecidas pezas pop desta galardoada autora. Segundo a crítica, un dos discos imprescindibles do 2019.

Astrogirl – The hunting (video oficial)

“Toro” é o título do disco de debut de Astrogirl, o proxecto de María Jesús Cabana que encantou aos fans do indie-pop. Un traballo que representa para a cantante coruñesa a forza interior que atravesa calquera barreira para expresar a verdadeira natureza de cada un. Toro é o símbolo de forza deste animal que, neste caso, representa á creatividade, que “está en todas as cousas e ábrese paso sexa como sexa aínda que lle poñas trabas porque é natural” segundo afirma a propia María Jesús.

Marem Ladson

Rematamos con Marem Ladson, un proxecto moi persoal e íntimo da artista ourensá de raíces estado unidenses. Combina letras introspectivas con elementos rock, pop e folk. Estamos ante unha especie de diario no que Marem inclúe moitos aspectos persoais e autobiográficos, un diario sobre o descubrimento dun mesmo, sobre as relacións persoais, sobre os acertos e os fracasos. Naturalidade, sinceridade e emoción son os ingredientes principais.

Aquí vos deixamos a lista ao completo para que lle botedes unha escoita tanto dende aquí coma dende a nosa canle de spotify e convidámosvos a que nos enviedes as vosas músicas galegas imprescindibles e ampliar a lista. Coma sempre, todos os traballos recomendados na lista podedes atopalos dentro do fondo das nosas bibliotecas, podedes consultar a súa dispoñibilidade a través do catálogo.

Guadi Galego – Costuras. A Banda da Loba – Fábrica de Luz. Tanxugueiras  –  Contrapunto. Silvia Penide – El Efecto Boomerang. Astrogirl – Toro. Sés – Liberar as arterias. Mercedes Peón – Isue.  Marful – Marful. Susana Seivane – Dende o meu balcón.  Ialma – Camiño. Alba María – Aínda. Leilía – Consentimento.  Jane Joyd –  Shy Little Jane Presents. Uxía – Meu Canto. Nastasia Zürcher – Beat.   Paula Parker – Live. MJ Pérez – A luz prendida. Cristina Pato – Mens. Rosa Cedrón – Entre dous mares.

 Ogallá pronto poidamos voltar a desfrutar da música ao vivo porque a importancia das redes sociais á hora de facer visibles os milleiros de proxectos foron e son unha ferramenta fundamental, a visualización do traballo das mulleres en festivais e eventos culturais xoga un papel clave á hora de normalizar a súa presenza na música galega. 

Lista Reprodución Fórum: Ultreia Peregrina

Ultreia Peregrina é o novo Ciclo Temático que abordaremos durante o primeiro trimestre do ano 2021 na Biblioteca Fórum Metropolitano.

Con motivo da celebración do Xacobeo este ano 2021, dende a Biblioteca Forum Metropolitano propoñémosvos chegar a Compostela a través dunha selección de lecturas, música, películas ou podcast distribuídas en sete etapas, onde poder  coñecer máis a fondo o camiño a Compostela. Tedes toda a información do ciclo na nosa web.

Cartel_vertical_fotografiaA Lista de Reprodución desta volta como non podía ser doutro xeito está composta por unha serie de cancións que pensamos que poden  inspirar a quen decida emprender o camiño ben sexa de xeito presencial ou virtual. Seleccionamos unha gran variedade de cancións para axudarche non só a facer este longo camiño, senón tamén para dar renda solta á túa imaxinación e axudarche a desconectar da realidade por momentos, porque diso tamén vai o Camiño.

Comezamos co grupo Ialma formado por catro vocalistas mulleres: Verónica Codesal, Natalia Codesal, Magali Menéndez e Marisol Palomo. Catro namoradas de Galicia. Vivindo en Bruxelas, manteñen un vínculo vital con Galicia, a súa patria e principal fonte de inspiración artística. As voces tradicionais caracteríticas das cantareiras fusiónanse con sons, melodías e arranxos máis modernos, dando cancións moi frescas e vivas, que son unha combinación intelixente para unha renovada música universal con algunhas conexións célticas. No seu quinto traballo Camiño de Bruxelas a Santiago, nótase máis a mestura de culturas para así mostrar unha Galicia aberta, unha Galicia que vaia ao encontro de todas as culturas e todas as linguas.

Ialma live at Brussels – Muziekpublique

E se do camiño falamos non pode faltar Luar na Lubre co seu disco Extra Mundi no que reflexan como saíron a dar unha volta por algúns dos países onde a súa música foi acollida. Así, ademais de reinterpretar algúns temas tradicionais da súa terra, viaxan a Portugal, o País Vasco, Asturias, a Gran Bretaña, Catalunya e o País Valenciano, onde fan unha versión algúns dos temas máis populares dos seus respectivos cancioneiros. En conxunto, esta selección de versións mantén a personalidade propia de Luar na Lubre a pesar da disparidade das súas procedencias. Unha personalidade moi ben traballada, cun estilo folk moi depurado, sen estridencias.

Recuperamos Benzón, o primeiro traballo en solitario de Guadi Galego que ofrece unha mestura de música tradicional e de autor en clave folk, jazz e pop. Segundo a propia Gaudi ” Benzón é hiperenxebrismo. O que di a xente do pobo cando está moi agradecida”.

Andrés Suárez – Pequeña Historia de Marina (Lyric Video)

Na lista podes atopar música moi ecléctica e de todos os estilos musicais, dende Mi pequeña historia do cantautor ferrolán Andrés Suárez, á fadista Dulce Pontes aos Zënzar de Cerceda ou o histórico grupo de hip hop Dios Ke Te Crew co seu terceiro disco O ciclo da serpe. E por suposto a selección musical do Camiño inclúe Santiago do compostelán Fredi Leis tan en boca por ser parte da banda sonora da serie “3 Caminos” pero que xa iniciou a súa carreira musical no 2013 na plataforma dixital Soundcloud, conseguindo miles de reproducións nas súas cancións. Os seus primeiros concertos foron en Santiago, na sala Soar e, aos poucos, foi crecendo ata encher a sala Capitol.

O peche poñémolo con Lodo de Xoel López, pertencente ao seu álbum Sueños y Pan (2017) e que forma parte da BSO da campaña turística do Xacobeo 2021. Aquí vos deixamos a Lista ao completo que tamén podedes escoitar a través da nosa canle de spotify e lembrade que moitos dos discos están dispoñibles na Biblioteca Fórum para que os levedes en préstamo.

Andrés Suárez – Mi pequeña historia. Lamatumbá – Paraugas Universal. Dulce Pontes  –  Peregrinaçao. Ialma – Camiño de Bruxelas a Santiago. Luar na Lubre – Extra Mundi. Los Suaves – Esta vida me va a matar. Fredi Leis – Neón.  Xabier Díaz – Noró. Amancio Prada – Trovadores, místicos y románticos.  Rosa Cedrón – Nada que perder. Raiceiras – Raiceiras. Sés – Rabia ao silencio.  Carlos Núñez –  A Irmandade das Estrelas. Milladoiro – Iacobus Magnus. Guadi Galego – Benzón.   Xoel López – Si mi rayo te alcanzara. Luz Casal – Un mar de confianzaZënzar – Vaise armar. Dios Ke Te Crew – O ciclo da serpe. Mago de Oz –  The best oz. 

Lista Reprodución Fórum: polo Nadal voltan os clásicos

De seguro que somos moitos os que estamos desexando que remate este 2020 tan atípico e dé comezo un novo ano máis cheo de esperanza ca nunca. Sexa como for o certo é que a conta atrás xa está en marcha e o Nadal á voltiña mesmo da esquina. Nas bibliotecas municipais xa están listas a mostras de nadal cunha estupenda selección de fondo bibliográfico para que desfrutedes nas vosas casas ademáis da xa tradicional “Guía de Nadal” chea de ideas para aos que vos gusta agasallar cultura, porque un libro, unha película e por suposto un bo disco son o mellor dos agasallos.

A lista de reprodución deste mes quedou do máis ecléctica en canto a sons e artistas pero ten un claro fío condutor, o da nostalxia. E é que polo nadal sempre voltan os clásicos.

Resulta inevitable non comezar a ritmo dos Beatles coa efeméride do aniversario da morte de John Lennon. O 8 de decembro de 1980 John Lennon foi asasinado na porta da súa casa en Nova York. No 40º aniversario deste suceso que sacudiu ao planeta enteiro, as homenaxes sucédense polas miles de emisoras do planeta. En Bibliosons abrimos a nosa lista con el.

O momento nostálixico segue co cantautor e multinstrumentista irlandés, Van Morrison, que leva triunfando desde os anos sesenta e con máis de 30 discos ás súas costas é un dos máis grandes da música ao que, sempre que a ocasión o merece, lle facemos un sitiño na lista. E dun dos grandes a outro dos grandes, o cantautor Leonard Cohen coa súa especial sensibilidade para as letras. Cohen foi máis popular como cantautor que como poeta, pero, paradoxalmente, recoñecéuselle máis esta última faceta que a primeira. Como cantante recibiu o Crystal Globe en 1988 por vender cinco millóns de discos fóra de Estados Unidos. Con todo, en literatura, a lista de galardóns cultivados é case interminable; mereceu dous títulos Honoris causa polas universidades de Dalhousie (1970) e McGill (1992), e en 2011 recibiu o Premio Príncipe de Asturias das Letras.

Incluímos tamén a Michael Jackson, Rod Stewart, Adele, Björk, Norah Jones ao gran Barry White e non nos esquecemos da polifacética Barbra Streisand, a muller que triunfuou pese a todo e a todos. Actriz, cantante, compositora, produtora e directora estadounidense. Ao longo da súa extensa carreira de máis de seis décadas, os seus logros na música, o cinema e o teatro convertérona nunha icona da cultura estadounidense.

A lista como xa adiantabamos é acaída para todos os gustos e desexamos que a escoitedes ao ritmo dos mellores desexos para este ano 2021 que está a piques de comezar. Deixámosvola ao completo para que a escoitedes tamén na nosa canle de spotify pero non sen antes despedirnos coa icónica canción “Viva la vida” porque diso, máis ca nunca vai a cousa. E lembrade que tedes todos os discos ao voso dispor na Biblioteca Fórum Metropolitano.

The Beatles – Sgt. Pepper’s Lonely Hearts Club Band, Imagine Dragons – Night Visions, Van Morrison – You’re Driving Me Crazy, Björk – Homogenic, Niño Josele – Paz, Coldplay – Viva la Vida, Rod Stewart – The Complete Great American Songbook, Michael Jackson – Blood On the Dance Floor – Mumford & Sons – Babel, Diana Krall – Wallflower, Norah Jones – Day Breaks, Adele – 19, Carla Bruni – No promises, Leonard Cohen – Songs from the road, Barbra Streisand – The concert, Vanesa Martín – Munay, U2 – No line on the horizon, Robbie Williams – She’s Madonna, Barry White – The ultimate gold collection, Simply Chillout – Simply Chillout.

Lista Reprodución Fórum: Outono a ritmo de música galega

Coma quen non quere a cousa pero expremendoo ao máximo pasou xa o verán, chegan as chuvias, a caída da folla e comezana refrescar os días. Estamos no outono, época para moitos de cambios e novos propósitos pero época tamén nostálxica coa que na Lista de Reprodución de Fórum volvemos á carga, desta volta facémola con música galega. Os seguidores do blog poden dar boa conta que dende Bibliosons apoiamos e visibilizamos a música e os artistas da terra. Con esa mesma idea creamos físicamente na Biblioteca Fórum unha sección de música en galego onde poderedes atopar cedés tanto de artistas galegos coma de que aqueles que cantan en galego. A lista podería ser longa pero coma sempre facemos escolla de 20 traballos que xa tedes listos para poder levar en préstamo.

Comezamos cos composteláns Novedades Carminha e o seu disco “Juventud infinita” onde podemos desfrutar da súa esencia garaxeira, toques descarados e canallas nas letras e temas moi pegadizos. O vídeo do single que leva o mesmo nome do disco foi estrenado por un medio tan importante como El País. Novedades segue estando de plena actualidade co seu hit “Mucho nivel”. Nós  abrimos boca con “Quiero verte bailar”.

Sen marchar de Compostela aproveitamos para facernos eco de Fredi Leis, intérprete, músico e compositor que desde pequeno empeza a tocar o piano de maneira autodidacta. Fredi Leis postúlase como unha das promesas da canción de autor renovada. Dáse a coñecer en Souncloud conseguindo centos de miles de escoitas e percorre salas e teatros do circuíto nacional de cantautores. Xa está dispoñible o single “Nivel experta” do que será o seu próximo disco que verá a luz no 2021. Namentras quedamos con “Mariposas” do seu traballo Neón.

Seguimos cunha das grandes revelacións da música galega e española dos últimos tempos, a ourensá Marem Landson. Filla de nai galega e o famoso baloncestista Willie Ladson.Tras debutar na primavera de 2018, cun primeiro álbum homónimo que cultivou críticas entusiastas, Marem, participou nunha infinidade de festivais ( FIB, Vida, Noroeste, Sinsal, Ribeira Sacra, Ewan Fest…). Un primeiro disco gravado con tan só 19 anos e composto por once cancións que se pasean polo pop, o rock e o folk. Landson ten influencias clásicas pero un son contemporáneo ao que acompaña de moita personalidade.

E con mulleres continuamos, concretamente co cuarteto de indie-rock  do Barbanza Agoraphobia. A banda nace no ano 2006, coma un cuarteto de amigas de instituto que compartían o gusto pola música punk e as ganas de facer as súas propias cancións. As Agoraphobia recén acaban de tocar no Festival da Luz. Na lista rescatamos o seu traballo “Incoming Noise”, un disco contemporáneo no que podemos desfrutar de dez cancións nas que conflúen distintas tendencias pero cun marcado carácter rock.

Neste outono musical a ritmo de música galega podes desfrutar ademáis de artistas tan dispares coma Davide Salvado, Los Suaves, Narf, os rapoemas da viguesa Aíd, o gran Iván Ferreiro, voltar ao sempre rememorable Deluxe co seu “Los jóvenes mueren antes de tiempo”, etc. E por suposto non queriamos deixar pasar a ocasión para render a nosa pequena homenaxe a gran Ana Kiro cando se acaban de cumprir, o pasado 24 de setembro, 20 anos do seu pasamento.

Coma sempre aquí vos deixamos a lista ao completo para que a escoitedes con ansia e ganas de bailar na nosa canle de spotify. Podedes consultar a súa dispoñibilidade no catálogo e vir a recollelos á Biblioteca, agardámosvos!!

Lista Reprodución Fórum: Outono a ritmo de música galega

Ana Kiro – Toda unha vida,  Jane Joyd – Shy Little Jane Presents, Marem Ladson – Marem Landson, Alba María –  Aínda, Tanxugueiras – Tanxugueiras, Iván Ferreiro – Casa, Cepeda –  Nuestros Principios , Fredi Leis – Neón, Novedades Carminha – Juventud Infinita, Miriam Rodríguez – Cicatrices, Agoraphobia  – Incoming Noise, Hard GZ, Tee Amara – Versus,  Davide Salvado – Lobos, Deluxe – Los Jóvenes Mueren antes de Tiempo, Los Suaves – Maldita sea mi suerte, Budiño – Fulgor, Narf – Nas Tardes Escuras, Aíd – Rapoemas, Luz Casal – La pasión, Xabier Díaz – Noró

Novidades musicais na Biblioteca Fórum

Con agosto xa rematando, todos sentimos aínda a necesidade de expremer ao máximo os últimos días deste verán tan atípico pero que saboreamos coma poucos.

Se algo botamos en falta durante a época estival foron os festivais e gozar da música ao vivo polas prazas e rúas da nosa xeografía. Un mazazo para moitos artistas que viron cancelar as súas actuacións unha detrás doutra en relación inversamente proporcional á subida do número de contaxiados polo coronavirus. Golpe tamén duro para ese público fiel que cada verán (ata este) se facía cos abonos de todas as fins de semana para coleccionar pulseiras no pulso.

Aínda que dende as Bibliotecas Municipais tampouco organizamos concertos polo de agora, seguimos apoiando a música e aos artistas galegos coa mesma intención. Facémolo completando o noso catálogo con discos praticamente saídos do forno e que xa podedes levar en préstamo.

Hoxe queremos falarvos das últimas novidades que incorporamos na Biblioteca Fórum Metropolitano. A algún dos artistas tivemos a sorte de poder entrevistalos durante o confinamento, como é o caso do xa amigo César de Centi, quen nos falou de como viviu a situación do confinamento e do seu último traballo “Bailando el incendio”. Un disco que xa tedes dispoñible no noso fondo. Se vos pica a curiosidade tamén podedes volver botarlle unha ollada á entrevista que fixemos fai un meses. Deixámosvola aquí.

Recén chegado á Biblioteca Fórum Metropolitano tamén está o novo traballo do ferrolán Andrés Suárez que leva o nome homónimo e que, en palabras do propio Andrés, é o disco “máis persoal” da súa vida onde cada canción é “un fragmento do seu pasado”.

De preto seguimos os traballos do grupo con raíces no Barbanza Agoraphobia de quen contamos con varios discos. Desta volta incorporamos “Unaligned”, traballo co que o cuarteto feminino de Boiro decidiron achegar o seu gran de area para facer máis levadeiro o confinamento, regalando a súa descarga dixital. Trátase dun álbum integrado por dez cancións, co que a banda viaxa á época máis alternativa dos anos 90.

De Guadi Galego faltábanos tan só a maravilla de “Immersion” para completar a súa discografía. Un disco en varias linguas, minimalista e arriscado que lle valeu o Premio á Promoción da Realidade Plurilingüe do Estado. En “Immersion”, Guadi recolle once temas xa editados nos seus anteriores traballos e outro máis inédito. Todo el é pura dozura, comezando pola capa, obra do gran Leandro Lamas.

Con “Liberando as arterias”,  un disco cheo de forza e calidade nas súas cancións, completamos tamén a discografía de Sés. O título do disco vén prestado dun poema da escritora e activista Luz Fandiño, cun verso que a artista leva tatuado no seu brazo e que reza: «Quero sangrar as miñas feridas para liberar as arterias».

Novidade é tamén o segundo disco das Tanxugueiras: “Contrapunto”. Sabela Maneiro, Aida Tarrío e  Olaia Maneiro, gañadoras do Premio MIN ao Mellor álbum en galego, demostran que a música tradicional galega pode avanzar cos tempos, renovarse a cada paso e chegar a calquera escenario. As Tanxugueiras foron moi activas nas redes sociais durante a etapa do confinamento e a nosa devoción por elas ven de cando tivemos a ocasión de entrevistalas aproveitando a súa actuación no AgoraSón 2019.

Os amigos dos músicos, ou o que é o mesmo os ADM, son unha desas bandas que están a remover a nova canción  galega. Os de Ourense foron recoñecidos como mellor grupo de pop nos Premios Martín Códax dá Música  Galega (2017) e deles podemos rescatar a definición que eles mesmos se atribúen: “Reflicten a herdanza de Suso Vaamonde, Benedicto e Bibiano ou Batallán, sen perder orixinalidade, frescura nin personalidade.” Se aínda non os coñeces, non deixes de botarlle unha escoita ao seu disco homónimo.

E pechamos recomendacións de novidades deste agosto cun estilo ben diferente: o do novo disco do directo de Hongo “Live to ruin”. Con este traballo tédesnos que permitir a licenza de non ser imparciais. É a banda do noso compañeiro Iván, a quen veredes detrás do mostrador de Infantil se vos achegades por aquí polo Parque Europa.

Escoitade, xulgade e bailade vós mesmos, aquí vos deixamos unha pequena lista con todas as novidades na nosa canle de spotify.

E lembrade que sempre queda verán mentres haxa música!!

Día da Música 2020

Iniciada en Francia en 1982 como “Festa da Música” e instituida como celebración europea en 1985 (Ano Europeo da Música), cada solsticio de verán, o 21 de xuño, a Unión Europea celebra unha xornada destinada a promover o intercambio cultural entre os pobos. O seu obxectivo é promocionar a música de dúas maneiras: a primeira, que os músicos afeccionados voluntariamente saian a tocar á rúa. A segunda, a organización de concertos gratuítos, nos que o público teña a oportunidade de presenciar directos dos seus artistas preferidos sen importar estilo nin orixe.

Este ano a situación é ben distinta e os efectos da COVID-19 na música aínda perduran impedindo que se poidan celebrar macro festivais e espectáculos musicais polos diversos escencarios do noso país. Na cidade o novo encontro coa música é  no teatro Colón da man do director convidado José Trigueros ás 12:30. Dentro da comunidade temos que viaxar ata Compostela para atopar concertos que festexen o Día da Música. A Cidade da Cultura organiza tres de pequeno formato a cargo de: El afecto ilustradoFAIA e Chisme, que se celebrarán ao longo de toda a xornada. Trátase da primeira programación cultural do Gaiás que contará con público, tras a cancelación deste tipo de actividades pola alerta sanitaria.

Cartel oficial do Día da Música no Gaiás

Pasado o día da música, a pesar de que a crise do coronavirus paralizou case por completo a industria musical, tres meses despois do inicio do confinamento, moitos músicos galegos xa empezan a programar os seus primeiros concertos aínda que con certas limitacións e as medidas sanitarias correspondentes. Axendas das que queremos facernos eco.

O 4 de xullo no Auditorio Pazo da Cultura de Pontevedra a cita é con Xabier Díaz e as Adufeiras de Salitre xunto a Guadi Galego. Aínda que a Guadi doulle tempo de facer a xira de “Immersion”, editado en outubro do 2019, non lle aconteceu o mesmo a Xabier Díaz. O seu traballo “As catedrais silenciadas” apareceu en escena no arranque da crise do coronavirus polo que a xira viuse truncada.

Pola súa banda, a artista coruñesa María Jesús Cabana, Astrogirl, estará en concerto en Ferrol o 17 de xullo presentando o seu disco TORO. Para quen aínda non a coñeza, no 2018 formou banda e quedou semifinalista no concurso Proyecto Demo de Radio 3, tocou no Festival Noroeste EG e no Festival da Luz, ademais de pisar escenarios de salas como Capitol (SDC), Mardi Gras ou Baba Bar (A Coruña).  Ademais colaborou con Nacho Vegas en directo en varias ocasións e no 2019 quedou finalista no concurso Sonidos Mans.

Triángulo de Amor Bizarro confirmou tamén actuación o 17 de xullo pero en Barcelona dentro de en Nits del Primavera, un ciclo organizado polo festival Primavera Sound, cancelado este ano e no que o grupo de Boiro era habitual no seu cartel. O coruñés Xoel López fixo o propio e confirmou que formará parte da Crew Nation, unha serie de directos na sala Riviera de Madrid.

No ciclo de actuacións especiais que acollerá no verán a terraza do Auditorio Mar de Vigo, o Festival TerraCeo, do que Los Secretos serán os encargados de  inaugurar o 3 de xullo, poderemos desfrutar, entre outras,  das voces do ferrolán Andrés Suárez e outros músicos como Pablo López, Ariel Rot, Álex Ubago, Coque Malla ou Don Patricio. Neste caso, os atardeceres con música e vistas ás Cíes estarán adaptados ás condicións sanitarias da nova normalidade e prolongaranse ata finais de setembro.

E non nos esquecemos da nosa aprezada Silvia Penide que recentemente foi noticia por ofrecer concertos nas ‘leiras’ dos seus seguidores no verán. A cantautora anunciaba a través das súas redes sociais, onde foi moi activa durante o confinamento, esta particular forma de facer chegar a súa música ás casas dos seus fans, ás que pode ir “soa ou acompañada polos músicos da banda” dicía.

Así que, a pesar de todo o vivido nestes meses, xa sabedes, opcións musicais hai e oxalá poidamos moi pronto desfrutar da música ao vivo sen restriccións de ningún tipo. Mentres tanto, dende Bibliosons propoñemos desfrutar da música sexa no formato que sexa durante este día da música e todos os días como unha canle que nos axuda a conectar coas nosas emocións e en moitas ocasións pode chegar a ser a mellor terapia. Estedes onde estedes, dádelle ao “play” e desfrutade da nova lista de reprodución especialmente preparada para o Día da Música. Podédela atopar na nosa canle de Spotify.

Lista Reprodución Fórum Xuño: a canción do verán

Xa entrado xuño comezamos coma quen di a época estival e dende logo se hai unha cousa que caracteriza ao verán esa é a música, unha parte esencial dunha das épocas máis esperadas do ano. Xa sexa nas radios, nos chiringuitos, nas discotecas ou nos reprodutores de música, a canción do verán non parará de soar.

Imaxe de Wolfgang

Imaxe de Wolfgang

Na Lista de Reprodución Fórum queremos adiantarnos porque a canción do verán chega sen que o esperes. Empézala a escoitar unha vez, e outra, e outra, ata que non podes evitar estar todo o día coa melodía na cabeza. Por iso na Lista de Reprodución Fórum deste mes facemos un repaso internacional por aquelas cancións que máis soaron nos últimos veráns. Pero non queremos caer en cancións facilonas con estribillos pegadizos que, sen querer se che meten na túa mente todo o día e non podes evitar tararear. Facemos unha recopilación de cancións que nos falan do verán e que polas súas melodías ou letras nos trasladan a días solleiros, cheos de enerxía e boas vibracións que tanto precisamos agora que comezamos a retomar pouquiño a pouco a tan ansiada normalidade. E é que hai cancións do verán nunca pasan de moda porque nos fan sentir simplemente ben!!

Que erga a man quen non cantou a todo meter Summer of ’69 do canadense Bryan Adams. A canción obtivo varios recoñecementos e chegou a situarse no posto número 5 do  Billboard  Top 100. Ademais a canción tivo un rexurdimento e converteuse posteriormente nun éxito de vendas en todo o mundo. En 2006 situouse no posto número 1 nas mellores clasificacións de Canadá, 22 anos despois de ser lanzada.

Nada máis que engadir ao que a revista de música online, This is Fake DIY , afirma sobre Plage dos Crystal Fighters:

“Lanzar la canción cuando la tienen es un movimiento inteligente por parte de la banda; musicalmente, tiene el tono perfecto y soleado para el verano, junto con algunas letras muy amigables para el festival. ‘Plage’ es un sencillo pop pegadizo y divertido, más que listo para quedar atrapado en ese toque quemado por el sol.”

Tom Baker

Non podemos deixar de sorrir e tararear cando escoitamos Summer dos desgraciadamente disoltos no 2019 WAS (antes We Are Standard e, antes ainda, Standard) que anunciaron a súa separación mediante un comunicado, por sorpresa e sen xira de despedida. Os vascos sempres fieis ao seu estilo con sons suaves e preparados perfectos para unha noite de verán.

E se hai algunha canción que nos recorde aos festivais e á época de verán esa é Un buen día de Los Planetas grupo festivaleiro por excelencia. Este verán non poderemos desfrutar dos festivais de música pero o que sí podemos é poñer o reprodutor, mercar discos ou collelos en préstamo na biblioteca máis próxima. Coma sempre, todos os temas que compoñen esta lista de reprodución están dispoñibles na Biblioteca Fórum e podes pedilos en préstamo a través da modalidade de cita previa activa dende o pasado día 1 de xuño. Podes solicitar a túa cita por teléfono, por correo electrónico ou cubrindo o formulario de solicitude de cita previa para o préstamo que habilitamos. En calquera caso, o persoal bibliotecario terá que confirmarche o día e horario aproximado no que podes acudir a realizar o préstamo.

Polo de agora dalle ao play e desfruta, tes a lista ao completo tanto en sopotify coma na nosa canle de youtube.

A música tamén é un medio para #DesconfinarALingua

As Bibliotecas Municipais vimos de celebrar toda esta semana Das Letras Galegas 2020 coa campaña “Desconfinar a lingua”, unha ocasión  na que coñecemos, usamos e vivimos a lingua con normalidade e sen filtros en todos os ámbitos e situacións. Desconfinamos a lingua amosando a nosa cara nas redes, con libros, discos, publicacións, filmes… na nosa lingua, como xeito de os mostrar, recomendar e dar a coñecer.

Agora que a semana remata toca despedir e dende Bibliosons queremos facelo como non podía ser doutro xeito con música do país, de aquelas e aqueles músicos galegos que empregan a nosa lingua como medio de expresión das súas creacións artísticas. Faremos un percorrido por todos os estilos e para todos os gustos.

Comezamos pola música tradicional do país e resultanos inevitable nomear ás Tanxugueiras. Hai precisamente un ano, tamén con motivo do Día das Letras Galegas  e para promover a lectura en lingua galega, o Servizo de Normalización Lingüística do Concello da Coruña organizaba o AgoraSón 2019, coas Tanxugueiras en concerto.Dende Bibliosons falamos con elas nunha entrevista polo miúdo onde definían que

Facemos música sen complexos, escollendo pezas tradicionais e dándolle o noso punto de vista. Todo isto facéndoo dende o corazón, o respecto e desfrutando moito facendo ese traballo. Somos tres mulleres orgullosas de selo, que desfrutan ao cantar e contar a nosa tradición e, sendo moi conscientes de que somos capaces de levar un proxecto desta magnitude adiante. E sempre coa máxima presente de que hai que darlle unha volta á música tradicional referíndose á necesidade de achegala aos nosos tempos, perder o medo a xogar con ela facéndoa nosa”

 

As Tanxugueiras contan no seu haber cun Premio MIN  ao mellor álbum en galego (2018), categoría na que competían entre outros artistas coa gran Mercedes Peón.Este ano repiten nominación na mesma categoría con Contrapunto e comparten cartel coa santiaguesa Banda da Loba – a quen tamén tivemos a ocasión de entrevistalas en Bibliosons e máis ca recomendadas quedan – e coa Familia Caamagno. As Tanxugueiras teñen tamén recoñecemento na categoría de Música tradicional e folk dos Premios Martín Códax da Música e nas Mellores músicas de Galiza 2019 por “Que non mo neguen”, Certame aRi[t]mar Galiza e Portugal.  Agora, recén acaban de recibir a noticia de que Contrapunto, o seu último traballo, está entre os 20 discos da WorldMusicChartsEurope do mes de maio. Un listado que deciden 42 xornalistas, DJs, programadores europeos de máis de 20 países. E Autocracia está no TOP 20 de temas mundiais dentro da WMCDE. Durante esta etapa de confinamento estiveron moi activas nos seus perfís das redes sociais e destacaron pola hora do tanxuvermú durante os días 28 de marzo ao 12 de abril onde realizaban conversacións virtuais con diferentes persoeiros entre eles a xornalista Pilar García Rego ou a gran Guadi Galego.

Da música tradicional pasamos a algo máis movido, cunha mestura de garage sesenteiro, rock and roll, e letras que non deixan indiferente a ninguén, falamos dos Familia Caamagno. A banda formouse en Sigüeiro (ben pretiño de Compostela) aló polo 2011. Entrevistas radiofónicas e en prensa escrita, aparicións executando ao vivo os seus temas na TV autonómica galega e críticas moi favorables en medios especializados axudaron a que os Caamagnos tiveran unha axenda xeitosa ao longo do 2013, ano que remataron triunfalmente levando o primeiro premio no Concurso de bandas da Deputación da Coruña. O 2014 iníciano co disco Hai que andar cos tempos! e no 2016 lanzaron Para unha vez que saimos. No 2019 con Había que intentalo! os Caamagno despregan un compendio de melodías pop, ritmos frenéticos e retrousos coreables co único afán de facernos bailar e quen tivo a sorte de velos en directo sábeo ben!

Cambiamos novamente de ritmo pero sen deprazarnos moito, porque ben pretiño de Sigüeiro seguindo a ruta do grelo chegamos a Ordes, localidade natal dos Dios Ke te Crew un grupo de hip hop creado aló polo ano 2003. O pasado 2019 sacaban á luz  O ciclo da serpe, o terceiro álbum de longa duración do grupo e sen dúbida o seu traballo máis completo ata a data. Neste disco conflúen estilos difrentes pero coa seña inconfundible das letras satíricas e cargadas de acidez referentes á sociedade na que vivimos porque segundo eles mesmos din cren na liberdade de expresión e así o amosan nas súas cancións.

Seguimos na comarca de Compostela sen ser á mantenta pero é que non queriamos deixar pasar a ocasión se de innovación falamos, de mencionar aos pioneiros do trap en galego, os Boyanka Kostova. Dúo compostelán que toma o seu nome dunha atleta búlgara de halterofilia campioa do mundo en 58 Kg. e implicada nos casos de dopaxe dos Xogos Olímpicos de Londres. A respecto de cantar en galego son claros, esto é o que respondían nunhas declaracións a “El Cofidencial”

“Nós non o utilizamos como unha arma para facer os temas simplemente como un medio… coma se o fixeras en catalán en Cataluña ou en vasco no País Vasco. É o noso idioma habitual, nada máis”.

Os santiagueses son orixinais á hora de elixir o nome e tamén na letra das súas cancións e promete “leiras” en vez de luxo. Leiras é unha canción de amor, desas nas que un se vende para conquistar a unha moza e cantan: ” Teño leiras” para conquistala. . A idea da letra sae do avó de Cibrán que segundo el mesmo lle confesou ao neto conseguiu conquistar á súa avoa porque tiña moitas leiras. Os Boyanka Kostova demostran así que este xénero tan de moda pódese mesturar coa cultura e o costumbrismo.

Emprendemos ruta cara o sur e chegamos a Cambados para falar de Paula Chaves, máis coñecida como Pauliña no panorama musical é unhas das voces femininas con máis carácter e personalidade hoxe en día. O seu estilo pode definirse entre a música countrie con rock e blues. Dentro do panorama musical galego é coñecida polas súas colaboracións con grandes nomes do rock como Vituco Neira, NAVE, etc., no 2018 emprendeu carreira en solitario pero rodeada de grandes músicos. Recentemente acaba de editar o seu segundo disco A Mafalda e antes do confinamento estaba a preparar a xira a que prometia acompañar dun show innovador e rompedor. Así que desexando estamos sobre os escenarios.

E rematamos moi a conto o noso pequeno percorrido polo música en galego de vangarda na cidade de Ourense. De alí son Os Amigos dos Músicos un grupo formado por experimentados músicos que proveñen de grupos e tradicións diversas, falamos de bandas como Niño y Pistola, Blood Filloas, O Sonoro Maxín, Annie Hall, Haecceidad ou Cinnamon Gum. O grupo nace como banda de acompañamento de O Neno Elliott (Daniel Alonso), pero despois da gravación de Osaka, unha adaptación do poema de Carvalho Calero (homenaxeado este ano polo Día das Letras) A orquestra filarmónica de  Osaka, comeza a funcionar de maneira independente. O que tiñan claro desde un primeiro momento era que querían reflectir na súa música toda a herdanza folk rock galega, desde Suso Vaamonde e  Batallán ata  Bibiano, todo iso sen que o seu son perda orixinalidade, frescura nin personalidade. Todos os integrantes do grupo cantan e compoñen, utilizando o galego como vehículo de expresión e transmisión de emocións.

O percorrido remata aquí pero podedes completalo coa Lista de Reprodución na nosa canle de spotify. Alí ademáis dos xa mencionados atoparedes artistas coma  MJ Pérez, Cuarta Xusta, O Sonor Maxín, Oh!Ayatollah, Los Jinetes del trópico, Momboi ou The Rapants entre outros. Que a desfrutedes e Feliz Día das Nosas Letras!!!

 

 

 

 

 

Día Internacional do Jazz: ferramenta educativa e motor para a paz

Se onte era o día da danza, hoxe toca o turno ao Día Internacional do Jazz. A celebración desta xornada decretada pola UNESCO, ten como obxectivo sensibilizar ao público en xeral sobre as virtudes da música jazz como ferramenta educativa e como motor para a paz.

En Bibliosons non queremos deixar pasar por alto a efeméride e facémonos eco das palabras de Herbie Hancock, embaixador de Boa Vontade da UNESCO

Agora máis que nunca,  unámonos e difundamos a ética do movemento global do Día do Jazz ao redor do planeta e usemos isto como unha oportunidade de ouro para que a humanidade se  reconecte especialmente no medio de todo este illamento e incerteza.”

Por iso aproveitamos a ocasión do día sinalado para resaltar e dar a coñecer a artistas galegos que se moven en torno a esta corrente musical.

Falamos de Son Trío, tres músicas: Katerina Linke (piano, composición), Su Garrido Pombo (voz) e Susanna Blanco (cello), que se xuntan no 2017 e por separado teñen unha gran formación artística. Veñen de crear o seu proxecto Miña almiña con música orixinal e letra de Rosalía de Castro, que soa moi orgánico e fresco, conseguindo emocionar ao público. Segundo reza a súa propia biografía  fan

música intimista e contemporánea nunha viaxe entre estilos dende o clásico até o jazz”

 

Ao percusionista ferrolán Miguel Lamas, bregado musicalmente a moi altos niveis a pesares da súa xuventude (27 anos) o da música venlle de familia e con escasos catro aniños xa comezou a tocar a batería. Traballou con multitude de artistas internacionais como: Raimundo Amador, Miguel Ríos, Amaia Montero, Miriam Rodriguez, Abraham Mateo, Andrés Suárez, David Bustamante, Tamara, O’Funk’Illo, Tomasito pero agora pasouse ao lado máis solitario e underground e segue acumulando gran cantidade de logros na súa afamada carreira. Aínda que o seu último disco “My Expression Way” ten un aire máis rock e punk, os seus dous primeiros traballos están moi relacionados co mundo do jazz e da música instrumental.

E con artistas xoves seguimos porque queremos destacar tamén o traballo de Xoana que está inmersa nun proxecto musical que ten como principal aliada a lingua galega, promocionando o seu uso coa axuda de ritmos como o pop, o rock, o jazz, o  funky e mesmo o reggae. Así nace “Dardos”, o disco co que irrompe no mundo da música. Ela mesma di

Cos meus 20 anos estou a dar os primeiros pasos neste longo camiño, mais sempre coa mesma idea presente: achegar variedade musical na nosa lingua cun pequeno gran de area. Non teño moito que contar dos meus inicios, mais si que espero que sexan o comezo dunha longa experiencia musical na que todos e todas esteades presentes”

E eu non podo máis que compartir o desexo desa longa e prometedora carreira musical para Xoana porque o galego precisa máis artistas compremetidos coma ela.

De máis longa traxectoria son Sumrrá o trío de jazz formado polos músicos Manuel Gutiérrez (piano), Xacobe Martínez Antelo (contrabaixo) e LAR Legido (batería). Cunha carreira de 20 anos e seis discos editados, ademais de centos de concertos convertéronse nunha formación de referencia na escena  jazzística española contemporánea. Desde os seus comezos Sumrrá  cautivou a público e crítica cun jazz  inclasificable,  melódico e moi aberto, destacando a orixinalidade das súas composicións, a calidade dos seus integrantes e a frescura dos seus directos.

No seu sexto álbum, 6 Mulleres,  Sumrrá rende tributo a seis mulleres poderosas que foron e seguen sendo fonte de inspiración para a loita por un futuro mellor para toda a humanidade: Frida Kahlo de México, Rosa  Parks de América, Rosalía de Castro de España, Quin  Jin de China,  Malala  Yousafsai de Paquistán e  Nawal O- Saadawi de Exipto. 6 Mulleres é unha achega á loita feminista desde a música contemporánea do século  XXI.

E non podemos rematar sen facer mención ao nome en maiúsculas do jazz en Galicia, o gran Abe Rábade que conta no seu haber cunha ducia de discos como líder. É autor dunhas 200 composicións orixinais (moitas de corte  jazzístico, pero tamén varias próximas á música experimental, á tradicional galega, ao flamenco ou á clásica). O pinista e compositor compostelán é licenciado Cum Laude en Jazz Composition e Piano Performance por Berklee College of Music (Boston, EEUU) en el 1999. Dirixe o seu trío de jazz acústico desde 1996, formado na actualidade por Pablo Martín  Caminero ao contrabaixo e Bruno Pedroso á batería.

Agardo desfrutarades desta velada a ritmo de jazz, que segundo a propia UNESCO non é só un estilo de música, senón que tamén contribúe á construción de sociedades máis inclusivas e dende as Bibliotecas Municipais por iso apostamos tamén!

 

Entrevista ao cantautor coruñés César de Centi

O pasado outubro César De Centi presentou o seu novo e terceiro disco baixo o título “Bailando el incendio”.Pasaron xa 18 anos dende que De Centi comezou a compoñer e tocar e dende aquela non parou. E é que o seu nome é un dos máis coñecidos no panorama de cantautores coruñeses. Se algo o define é ser músico dos directos porque escenarios ten ás súas costas, entre eles, xa hai anos, pasou pola Biblioteca do Fórum onde unha servidora tivo a sorte de poder escoitalo e desfrutar da delicia da súa voz e guitarra.

B. Antes de comezar é ineludible preguntar como estás a vivir esta situación de confinamento que nos tocou, e sobre todo, ¿en que momento profesional te colleu?

C. Pois, a verdade, con certa incertidume, xa que e difícil non pensar no traballo; o confinamento en si mesmo por agora non é duro, penso na xente que ten máis dificultades ca min e se me estremece o corazón, sobre todo nos grupos de risco. No que se refire o momento profesional, teño que dicir que foi no medio da xira de “Bailando el incendio”, un momento delicado, xa que trala inversión do disco teño a necesidade de movelo todo o posible e así poder seguir traballando e recuperar o esforzo. Por exemplo, é moi probable que ata finais de ano non poida recuperar certas datas importantes para min en cidades onde teño público. A meta deste disco é tratar de saír o máximo posible fóra de Galicia, para chegar ao máximo de xente posible.

B. Todo apunta a que aínda imos tardar en poder desfrutar dos directos pero a resposta de artistas e creadores nas redes non se fixo esperar, concertos en streaming dende os salóns das súas casas, sesións vermú e mesmo organizacións de festivais. A ti en concreto vémoste a través de Instagram e Facebook Live colgando cancións, ¿Que opinas de todo este fenómeno?

C. Eu fixen un os primeiros días, e ao mellor fago outro, non o teño moi claro. Penso que os músicos en xeral sempre estamos aí tratando de axudar e de compartir o noso traballo de moitas maneiras, incluso ás veces gratuitamente, pero eu non chamaría concerto ao que sucede en internet todos estes días: é unha mostra que ten pouco que ver cos concertos. Quizais os músicos nos estamos adaptando a esta nova situación sobre a marcha, pero creo que temos que ter coidado. É ben certo que cada un pode facer o que lle peta co seu traballo, pero as condicións dos streaming, para min, non son as mellores (conexión, son, gravacións desde os móbiles…), e creo que é importante que o público non cambie un concerto en directo, dos de toda a vida, cos streaming que estamos a facer estes días. Animo dende aquí á xente para que, cando poidamos volver a tocar en bares, auditorios…, axude ao tecido musical indo a ver música en directo. Por certo, coido que debemos aproveitar para tratar de activar os nosos medios sociais, xa que dispoñemos de máis tempo libre. No meu caso estou a gravar vídeos de temas propios e versións, para ter contido que amosar ao público.

B. ¿Como pensas que será a situación cando todo volva á normalidade? ¿A xente tomará conciencia? ¿Haberá realmente un antes e un despois?

C. Esta é unha pregunta difícil: noto que o impacto do virus está trocando a mentalidade da xente, a conciencia de que somos seres humanos con caducidade, algo que parecía que tiñamos esquecido. Oxalá saiamos desta crise aprendendo algunhas leccións importantes: . por exemplo, a importancia da nosa sanidade, dxs traballadorxs da mesma, que nos dan leccións diarias de compromiso. Daríame moita pena que dentro duns anos xa non recordemos esta situación extraordinaria que estamos vivindo, pero hai que ter esperanza e pensar que algo trocará.

B.  Aínda tocados pola recente perda a semana pasada do mestre Aute, sabemos que eras un gran admirador, ¿como te marcou a súa traxectoria?

C. Marcoume moito, Aute foi un visionario, un artista en maiúsculas. A primeira das súas obras que coñecín non foi un disco en solitario, senón Mano a Mano, o concerto en directo con Silvio Rodríguez. A partir de aí indaguei na obra dos dous, que se converteron en grandes referentes. “Anda” o “Las cuatro y diez” foron dúas das primeiras cancións que aprendín a tocar coa guitarra. A miña nai traballou nunha das poucas tendas de discos  que había na cidade hai anos, e nela soaban cancións de Aute, Serrat… Cando me decatei do seu falecemento tiven unha sensación de tristura moi grande. Os referentes acompáñante toda a vida, como a min Aute, e iso que soamente coincidín con el unha vez en Betanzos, pero levo toda a miña vida con el nos auriculares.

B. Falabamos ao comezo dos teus 18 anos xa no mundo da música. Imaxino que os comezos non tiveron nada que ver co momento actual e co anterior disco. Cóntanos, ¿como esa evolución? Para quen aínda non tivo a ocasión de escoitar este último disco, ¿que se vai atopar?

C. Os comezos marcaron o camiño, recordo que as primeiras veces cantaba para divertirme, era mais novo, no tiña a presión que ás veces me impoño na actualidade. Trataba de compaxinar a música coa socioloxía e sempre gañaba a música. A situación era diferente: era un pouco a novidade, e era máis sinxelo chegar a máis xente, ao público estudantil que recalaba nos concertos a pesar de que estaba empezando. Todo era máis amateur e se notaba no directo, pero hoxe en día cambiaron as tornas e fago un traballo profesional. Agora tamén é mais complicado chegar á miña xeración, que ten outras responsabilidades e lle resulta máis complicado ir aos concertos. Por outro lado, a música non ten clase media, e polo tanto un músico da miña clase ten que estar acostumado as dificultades do seu traballo.

Con respecto o anterior disco, La luz de los gigantes, foi un momento moi doce persoalmente, conseguín a financiación do disco gracias a un crowdfunding, o que me abriu algunhas portas e crecín como artista. É un traballo ao que lle teño moito cariño.

O novo disco, en cambio, ten a produción de Xabier Vizcaino, que cambia de forma coherente a miña obra, abríndoa a outros estilos. A idea era non perder a esencia de miña personalidade, pero tratar de ofrecer algo diferente. Neste disco hai máis guitarras acústicas e eléctricas, sen deixar de lado aos referentes inmediatos da miña obra (Silvio, Aute, Pedro Guerra, Ismael Serrano, Serrat) pero tratando de agregar outros máis novos como Damien Rice ou Glen Hansard, entre outros. No novo traballo conto coas colaboracións de dous grandes músicos: Fito Mansilla e o propio Xabier, que para min ten un dos proxectos mais interesantes que hai en Galicia na actualidade. 

B. ¿Que significou para ti ter a oportunidade de presentalo no Teatro Colón? De momento a situación está truncada pero cando volte a actividade, ¿poderemos desfrutar de novo do teu directo na cidade?

C. Tocar no Colón foi un dos regalos que me deu a música, e o sinto como parte dun proceso de traballo duro que partiu sempre da defensa das miñas cancións, da mellora continua, de tocar en practicamente tódolos espazos da cidade. Foi un día que pasou voando, aparte estiven acompañado da banda e de invitados, así que foi máis especial si cabe. É un día que quedará para sempre no meu recordo, a pesar de que espero seguir avanzando e poder repetir no Colón ou noutro dos fantásticos espazos que temos na cidade.

B. ¿Recoméndasnos un disco ou un artista co que pasar o confinamento da mellor maneira posible?

C. A verdade e que se me ocorre máis de un, e deixo moitos fóra. Todos eles me gustan, a orde dos factores non altera o produto. Por exemplo, Atlántico de Xoel López, Mis paisajes interiores de Marwan, Humo y Azar de Aute (pero tamén o Mano a Mano con Silvio Rodríguez, claro), Sur la route de Zaz, La paloma de Picasso de Luis Pastor ou calquera do grupo cubano Buena Fé.