Pandemia musical

Nestes tempos convulsos de coronavirus e ante a perspectiva de ter que pasar unha tempada de peche domiciliario, a industria musical non tardou en reaccionar, propoñendo iniciativas dispostas a entreter ao público e concienciar sobre a importancia que ten ficar na casa. Moitos artistas e plataformas uniron forzas, conxuntamente e por separado, para construír unha oferta de concertos online, que ao longo destes días vanse sucedendo gratuitamente a través da rede para que gocemos da música “en directo” sen movernos do noso fogar.

Neste post queremos achergavos algunhas das propostas streaming máis atractivas para amenizar o confinamento:

O pioneiro: #YoMeQuedoenCasaFestival

Nun comunicado emitido pola organización explicaron que os artistas están a vivir en primeira persoa a crise do coronavirus: “Os propios músicos están a sufrir a crise global nas súas propias carnes, dado que moitos tiveron que cancelar os seus concertos nas próximas datas, así que quixeron aproveitar a situación para, de forma altruista, ofrecer a súa música como antídoto contra o aburrimento”.

Tralo exitazo do pasado fin de semana (no que contou con artistas como Rozalén, Carlos Sadness, Rayden, Alfred García…), chega unha segunda edición para os días 20, 21 e 22 de marzo.

O funcionamento do Festival é moi sinxelo. Cada artista realizará un directo desde o seu propio perfil de Instagram a unha hora establecida (sinalada nos carteis oficiais e redes do evento) e terá media hora para tocar uns temas e compartir cos seguidores o que desexe. Os “festivaleiros” irán saltando de perfil en perfil para ir coñecendo as propostas que teñen preparadas para o público.

Cuarentena Fest

Na liña do anterior, este proxecto propón un cartel moi potente formado por artistas e selos da música independente do noso país. Participan na iniciativa diversos selos discográficos e artistas españois e arxentinos, entre os cales destacan Carlota, Papá Topo, El Petit de Cal Eril, Cuchillas, Lashormigas, Pixel de Stael, Valdivia ou The Crab Apples. Ata o 27 de marzo podes seguilo a través de cuarentenafest.tumblr.com ou nas canles de Youtube dos distintos artistas.

CuarentenaFest

#Coronafestival

A través deste hashtag atopamos en Twitter outra iniciativa de microconcertos caseiros que convocou o xornalista, musicólogo e pianista Pep Gorgori, o primeiro en ofrecer un pequeno recital de pezas clásicas. A clavecinista María José Anglés tomoulle o relevo, e seguen sumando intérpretes dispostos a que non nos esquezamos dun xénero tan beneficioso e estimulante como é a música de cámara.

Streaming Rock Fest: Como en casa, en ningún sitio

Que si, que tamén hai alternativas para os máis roqueiros! Varo Torres, de Rock 66 Radio, ca axuda de GarridoRock e Gaser Discos, capitanea esta iniciativa grazas aos seus contactos no mundo do rock. Este festival terá lugar os días 20, 21 e 22 de marzo dende as contas de Instagram das diferentes bandas participantes, pero tamén podes seguilos desde @manerasdevivircom, @elamplificadordelrock e Manerasdevivir.com.

Bandas como Gritando en Silencio, Fran Mariscal, Gato Ventura, La Desbandada, os coruñeses Tregua… demostrarán que o rock pode con todo!

streamingrock

Mantita Fest

Outra alternativa é o Mantita Fest, un festival de cantautores e cantautoras que xa comezou o martes 17 e rematará o sábado 21. Tamén neste caso a conexión faise dende os perfís de Instagram dos artistas. Nesta proposta, máis canalla e mestiza, poderemos escoitar a Miguel Campello, Chiki Lora, Capitán Cobarde, Astola, Arco, Gato Charro

MANTITA

E non como parte dun festival, pero co mesmo entusiasmo, moitos artistas e grupos do panorama nacional tamén están a ofrecer directos nas súas contas de Instagram e Facebook, que logo manteñen publicados nas stories para gozalos no momento que desexemos. Compartir salón con nomes tan potentes como Izal, La M.O.D.A., Ismael Serrano, Rozalén, Second… é, nesta situación extrema, un luxo ao alcance de moitos.

As salas de concertos coruñesas tampouco quedan atrás. A pesar de ter as portas pechadas, contas como a da Sala Mardi Gras ou a de Bembiú Jazz Bar andan a compartir vídeos dalgunhas actuacións en directo que tiveron recentemente nos seus locais.

Mentres isto pasa nas redes, outras tantas persoas anónimas non poden evitar saír ó balcón do seu domicilio para despregar o seu talento e creatividade. En diferentes países estanse sucedendo cánticos de cancións emblemáticas, así como a interacción dos veciños dispostos a facer máis pracenteira a vida no barrio:

Respostas optimistas, creativas e solidarias ante unha situación que hai semanas ninguén podería imaxinar. Unha adaptación á excepcionalidade que está a sacar momentos de gran humanidade, e que nos recorda que a música non entende de barreiras nin de virus. Desde as Bibliotecas Municipais insistimos na importancia de quedar na casa para asegurarnos de que o contaxio sexa exclusivamente de ritmos e melodías.

Concertos nos mercados: Día da Biblioteca con Letras no Mercado

O 24 de outubro  celebramos o Día da Biblioteca instalándonos nos mercados  municipais coa proposta #Letrasnomercado de 9.00 a 14.00 h, poderasnos atopar nos seguintes mercados municipais : As Conchiñas, Monte Alto, Santo Agostiño, Praza de Lugo e Elviña. Haberá sorpresas, libros, música, obradoiros…

Polo que respecta á música, será a protagonista no Mercado de Elviña e no das Conchiñas:

  • Mercado de Elviña: Concerto “FemininoPlural Silvia Penide á voz e Carla López á voz e ao piano, renden homenaxe ás autoras femininas ao longo da historia co seu espectáculo “Femeninoplural”, que achega ao público unha ruta musical e poética, un universo de mulleres autoras, de libros e cancións. Soarán cancións de Amaral, Guadi Galego, Julieta Venegas, Patti Smith e escoitaremos textos de Lucía Aldao, entre outras.

  • Mercado das Conchiñas: Porque sí, con Aldaolado: O proxecto Aldaolado está formado polas poetas María Lado e Lucía Aldao, que desde o ano 2005 achegan a poesía dun xeito diferente ao público.O espectáculo “Porque sí”, mistura recital de poesía en galego, humor e música en vivo. Aldaolado consegue facer do recital poético un acto atractivo, íntimo e divertido para todo tipo de público, ata aqueles que nunca leron a poesía, facéndonos rir e emocionando ao mesmo tempo. A súa ampla experiencia no teatro permítelle combinar a improvisación e falan sobre o amor, o idioma, as mulleres ou as súas propias experiencias como creadores, entre outros temas.

Pero ademais da música, consultade a programación, porque haberá teatro, contacontos, obradoiros… e moitas sorpresas. Vivan as Bibliotecas!!!!

Lista de Reprodución Forum: imos de festivais

Na nova Lista de Reprodución facemos un repaso polos artistas e grupos dos festivais deste mes de setembro. Desde os máis próximos, como Marineda Unplugged ou o Festival de la Luz; a outros máis afastados, como Ebrovisión, Donostia Kutxa Kultur Festibala, Dcode, Granada Sound, Neox Rocks ou o Festival Altaveu.

Empezamos co Marineda Unplugged, que na súa primeira edición trouxo á cidade á banda coruñesa Sensacional, á cantante bilbaína La Bien Querida, ao santanderino Ángel Stanich, ao ex líder dos Piratas, Iván Ferreiro, e a Anni B. Sweet. A cantautora malagueña co seu folk suave e melancólico, converteuse nunha das nosas artistas máis internacionais, e xa foi de xira por Europa, América e Asia. E é que Anni B Sweet obtivo o primeiro premio do concurso de maquetas da revista Mondosonoro, foi convidada por Antonio Vega para abrir un dos seus concertos en Valencia e foi contratada polo FIB antes de lanzar o seu primeiro disco, Start, Restart, Undo (2009), que a converteu na creadora máis nova nomeada a Artista Revelación e Autor Revelación nos Premios da Música. Traémosvos un dos temas do seu EP Ridiculous Games (2013), Cruel City, que fala da procura constante da harmonía cando tes todo en contra.

O Festival de la Luz acaba de celebrar a súa quinta edición. Neste espectáculo diferente e único, Luz Casal convida a gozar dun festival solidario e interxeracional na súa casa natal de Boimorto, onde, ademais de música, púidose gozar de gastronomía, creatividade e experiencias. Todo nunha contorna na que priman a natureza, a reciclaxe e a innovación. Este ano, nos escenarios de Andabao, actuaron 36 artistas de estilos moi diversos: desde o grupo de folk galego Malvela, ata Chris Barron, o cantante da banda Spin Doctors.

Polo Festival tamén pasou o tinerfeño Pedro Guerra -ex compoñente de Taller Canario, un dos grupos máis importantes da Nova Canción Canaria-, que en 2001 publicou Ofrenda, o seu quinto traballo en solitario, no que se fusionan elementos musicais de orixes moi diversas. O tema que dá nome este traballo foi interpretado, xunto a Santiago Auserón, no seu álbum en directo 20 anos. Liberdade 8 (2014), gravado no local que lle ofreceu cantar todos os martes, permitíndolle trasladarse de Canarias a Madrid.

A terceira edición do Neox Rocks reunirá en Xetafe ó mellor do indie nacional. Polos escenarios da cidade madrileña pasarán Xoél López, La Habitación Roja, Carlos Jean, Lori Meyers, Nacho Vegas e Izal, entre outros. O grupo madrileño xa pasou este mes por Ebrovisión e o B-Side Festival, onde arrasaron. Magia & Efectos Especiales (2012) foi o seu primeiro álbum, naceu da autoxestión artística e económica, e conseguiu saltar á primeira liña do panorama musical nacional. Este traballo fíxolles gañar o Premio da música Independente como Grupo Revelación en 2013, e tivo unha boa acollida por parte do público. Destacamos Que bien, unha canción positiva e alegre, que a punto estivo de quedar fora do disco, xa que é moi diferente ao resto dos temas, pero que a día de hoxe segue sendo coreada nos concertos, pois é unha das favoritas do público.

Nas mesmas datas que o Neox Rocks (23 e 24 de setembro), en Andalucía estarán a gozar do Granada Sound, coa música de Amaral, León Benavente, Love of Lesbian e algúns dos artistas anteriormente mencionados. Pero polos escenarios granadinos tamén pasará Fuel Fandango, o dúo formado polo produtor canario Alejandro Acosta e a cantante cordobesa Nita (Cristina Manjón), que fusionan funk, soul, electrónica, jazz e flamenco, tempo que mesturan nas súas letras inglés e castelán, obtendo así un estilo moi propio. O seu segundo álbum Trece Lunas (2013), foi gravado entre Madrid, Tarifa, Córdoba e Londres. Recomendámosvos New Life, un tema moi pegadizo, especialmente o refrán, a única parte en castelán do tema.

Deixámosvos aquí a Lista completa. E lembrade que tedes os álbums dos traballos seleccionados na Biblioteca Fórum para levalos en préstamo.

Amaral – Las puertas del infierno, Anni B Sweet – Cruel City, Arizona Baby – It is called work, Bunbury – El hombre delgado no flaqueará jamás, Delorean – Unhold, Elefantes – Que yo no lo sabía, Fuel Fandango – New life, Guadi Galego – Matriarcas, Hombres G – Venecia, Ismael Serrano – Vértigo, Iván Ferreiro – Puro nervio, Izal – Qué bien, José Mercé – Nanas de la cebolla, La Bien Querida – De momento abril, La Habitación Roja – Ayer, Lori Meyers – Zen, Marlango – Dinero, Miguel Costas – No somos de aquí, Nacho Vegas – Runrun, Pedro Guerra – Ofrenda, Rosa Cedrón – Arde el mar, Sr. Chinarro – La ley de Murphy, Susana Seivane – Curuxeiras. Xosé Manuel Seivane, Tachenko – Hacia el huracán, Triángulo de amor bizarro – De la monarquía a la criptocracia

Pistoletazo de saída dos Xoves na Sagrada: La Senda de Afra

Frescura e actitude, son elementos que definen quen son e que fan La Senda de Afra, os encargados de poñer a banda sonora ao primeiro dos concertos de outono de Xoves na Sagrada o vindeiro 22 de outubro.
A banda de pop-rock deu os seus primeiros pasos no 2008, da man de Sheila Orro e Patri Varela. Con un contundente son pop-rock e unha forte posta en escena, dende o seu debut en directo no 2009 no campus de Santiago ata hoxe obtiveron éxito tras éxito.

Gañadores de concursos musicais de prestixio como “Nordés” dos 40 Principais, a primeira edición do “QueroStar” ou a final do“Noroeste Pop Rock” no verán do 2014.

A guinda foi o “Beefeater London Sessions”, que os levou a Londres aos míticos Abbey Road Studios. Alí gravaron dous temas que foron publicados exclusivamente en formato dixital para ser distribuídos pola rede.

O seu primeiro disco “Tardes de Abril” totalmente autoeditado, foi moi ben recibido polo público. O tema que lle da nome conta cun videoclip gravado no Teatro Rosalía de Castro da Coruña e dirixido por Gonzalo Cotelo, que podedes ver no seu canal de youtube


O seu último proxecto “Nuestro secreto”  inclúe os temas feitos en Abbey Road Studios de Londres como “Noches en vela” ou o seu último vídeo “Tomenta de verano”


Este concerto estrea o noso ciclo de outono, que ven cheo de sorpresas. Que mellor, para esas tardes de outono, que achegarse á Biblioteca Municipal Sagrada Familia e escoitar un concerto en directo. Aí van as datas para os nosos Xoveadictos. Un cartel variado e con personalidade:

carteloutono II

Benditas “Lúas de outubro e agosto”

Recén saído do forno poucas presentacións merece que non se lle fixeran xa. Lúas de outrubro e agosto é o segundo álbum en solitario de Guadi Galego. Un traballo que chega despois de  Benzón (2009) e logo de ter participado en proxectos colectivos tan celebrados como Nordestinas, Espido e aCadaCanto.

luas

Son dez temas, con letras ben reflexivas, cos que a ex-vocalista de Berrogüeto se alonxa do rexistro folk para facerlle as beiras ao pop. En palabras da propia Guadi:

O meu pop de autora é un chisco sofisticado e con cheiro a música popular

O disco saíu á venda o 25 de novembro coincidindo co Día Internacional dos Dereitos Humanos e presentouse de xeito oficial o sábado 6 de decembro no Culturgal, a feira das industrias culturais que estes últimos anos se ven celebrando en Pontevedra.

Unha, que tivo a sorte de coarse entre “bambalinas” puido asistir aos ensaios e á marabilla de concerto cun cheo absoluto de público no espazo da carpa. Tanto pequenos coma maiores gozamos do sentimento que Guadi pon en cada nota. É, sen dúbida, unha das artistas galegas con máis personalidade á hora de cantar.

Foi un deleite sen fin dende o “Mergullei” que xa prometía nas probas de ensaio ata o  “Matriarcas”, toda unha oda en homenaxe ás mulleres galegas que ademais conseguiu un éxito fulminante en Youtube con preto de 15.000 visualizacións en tan só dous días.

Á marxe de polémicas e debates que sairon á palestra sobre o feminismo, logo da publicación do artigo de Helena Miguélez Carballeira, titular de estudos hispánicos na Universidade de Bangor (Gales) e directora do Centro de Estudos Galegos en Gales, e de tantos outros que están xurdindo, “Matriarcas” xa se converteu en todo un himno da muller galega. A letra fala das mulleres como  aleitadoras do mundo e “brillantes activistas da vida cotiá”, unha vida cotiá que, por certo, non necesariamente se restrinxe á doméstica. “Nós pouquiño a pouco ímonos situando, construindo barricadas no país dos alalás” -di Guadi.

Co éxito e a polémica de telón de fondo, sen meternos en máis leas, deixo aquí a miña encarecida recomendación de “Lúas de outubro e agosto”. Un traballo que contentará aos fieis de Guadi porque a pesar de ter un ton diferente ao que nos ten acostumados, conseguimos atopar nel a súa esencia e tamén a quen o escoite por primeira vez, unha combinación tan difícil como fermosa de lograr.