Lista Reprodución Fórum: Radio 90´s FM

Este ano o Fórum Metropolitano cumpre 25 anos (1996-2021) e para celebralo, dende a Biblioteca Fórum queremos achegarvos as mellores obras da década que o viu nacer, libros, películas e por suposto non podía faltar a lista de reprodución da que consideramos a época das nosas vidas.

Podemos desfrutar da coñecidísima banda estadounidense Nirvana co seu In utero que foi número 1 1 da lista Billboard 200 recibindo moi boas críticas. Como curiosidade apuntaremos que O álbum foi lanzado en 1993, seis meses antes de que Kurt Cobain suicidásese na súa casa, o 5 de abril de 1994.

E seguimos cos californianos Queens Of The Stone Age a quen os define o son pesado das súas guitarras eléctricas aínda que o longo da súa carreira sufriron diferentes influencias e estilos.

E se nos 90 andamos non podiamos deixar fora a Blur, que xunto con Oasis, foi un dos nomes máis populares do brit-pop dos anos 90, termo acuñado pola prensa británica para englobar a bandas que retomaban as formas máis melódicas e guitarreiras das bandas inglesas máis coñecidas dos anos 60, como os Beatles, os Who, os Rolling Stones ou os Kinks.

Dentro do panorama do país seleccionamos aos Resentidos banda de rock galega procedente de Vigo e que formou parte da movida desa cidade. Rescatamos o seu disco máis aclamado pola crítica e publicado nos 90 que foi Jei. Banda que por certo a comezos de ano e, 28 anos despois, sacaron novo disco Organización Nautilus.

A lista continúa con moitas outras bandas, moitas delas co nome xa ligado á década dos 90 como é o caso de Garbage a pesares de sacar discos despois. Metallica, Björk e Jeff Buckley entre outros están tamén entre os nosos elixidos. Aquí vola deixamos ao completo para que a escoitas e rememores.

Björk – Homogenic. Pulp  – This is hardcore. Garbage  –  Versión 2.0. Rage against the machine– The battle of Los Angeles. Extremo Duro – Agila. Os Resentidos – Jei. Jeff Buckley– Grace.  Veneno – El pueblo guapeao. Nine Inch Nails – The Downward Spiral.  Morente & Lagartija Nick– Omega. Oasis (What´s the story) morning glory?. Dinosaur Jr. – Green mind.  Alice in Chains –  Alice in Chains. Sinéad O’Connor – Am I not your girl?. Nick Cave & the Bad Seeds – Murder ballads.  Metallica – Metallica. Hole – Celebrity Skin.Nirvana – In utero. QueensOf The Stone Age – Queens Of The Stone Age. Blur –  Blur.

Lista de reprodución Fórum: últimas novidades

Se non o fixestes xa, botádelle unha escoita á nova Lista de Reprodución do mes de maio da Biblioteca Fórum. Desta volta ven cargada coas últimas incorporacións musicais que van dende o rock alternativo dos estadounidenses Nada Surf ata a mestura de  pop, blues, folk, rock e sons tradicionais creando un estilo musical de seu de A Banda da Loba.

Fabrica de luz é o traballo que podes escoitar na lista de reprodución deste mes. Un canto á creación e á liberdade e toda unha declaración de intencións  no que a banda xa se aproxima á obra da homenaxeada nas letras Xela Arias coa canción Tigres coma cabalos. Trátase dun bolero que tamén aparecerá no novo traballo recén publicado Hasme oír esta vez coa incorporación da voz de Xacobe Varela, cantante do grupo Os d’Abaixo. Hasme oír é  unha homenaxe máis coidada e precisa. Contén catro cancións, unha por cada poemario: Intempériome, Darío a diario, Denuncia do equilibrio e Tigres coma cabalos, así como uns interludios musicais recitados entre cada un deles.

A banda da Loba – Tigres coma cabalos (Folk Sessions)

Cun concerto en streaming para todo o seu público comezaba Passenger o ano. Unha gran iniciativa por parte do artista para que todo o mundo poidera velo en directo, xa que o panorama actual impide aínda poder gozar dun concerto como os de antes. Un concerto onde  interpretou todos os seus éxitos e todos os deste novo traballo, Songs For The Drunk And Broken Hearted que dende a biblioteca xa tedes dispoñible para levar en préstamo. Pero para os máis seareiros non perdades a esperanza aínda porque se as condicións da pandemia o permiten, Passenger, pasará por España na xira de presentación do seu álbum. Farao en dúas datas: o 12 de outubro na sala A Riviera de Madrid; e o día 13 na sala Razzmatazz de Barcelona.

Passenger | A Song For The Drunk And Broken Hearted (Official Video)

Seguimos cunha auténtica estrela do pop aos seus 25 anos. a cantante albano- kosovar Dua Lipa, leva desde os 14 anos adicándose ao mundo da música. Luz, cor e música disco son os elementos fundamentais que atoparás no seu último traballo Future Nostalgia.

Dua Lipa: Future Nostalgia, portada do disco
Dua Lipa: Future Nostagia. Portada do disco

E voltamos á terra coa orixinal banda de Vigo Bifannah e o seu  segundo traballo Danças líquidas. Son orixinais ata no nome en homenaxe a unha comida portuguesa, pan recheo de carne de porco, “bifana” moi típido de Porto, onde Guille (voz e guitarra) vivíu cinco anos. Na súa música podemos atopar combinación de rock sesenteiro, latín soul e tropicalia.

Bifannah-Capri

Na lista podes escoitar tamén ao madrileño Depedro en xira co seu novo espectáculo Érase una vez Depedro no que busca a interacción coa audiencia. Un gran espectáculo, tanto para nenos como para adultos, a non perder. Sidonie son un clásico xa nas nosas listas, e desta volta veñen con El regreso de ABBA. Son 23 cancións inspiradas na novela homónima publicada polo cantante Marc Ros. Sen dúbida un completo e ambicioso traballo do trío catalán.

Sidonie con Kimberley Tell – Me Llamo Abba

A lista segue con nomes da talla de Nathy Peluso, Saint Etienne ou Travis. Aquí vola deixamos ao completo para que a desfrutedes con calma e se gustades, xa sabedes, podedes levar os discos en préstamo, consulta antes a súa dispoñibilidade no noso catálogo.

Malandrómena – Cada can que lamba o seu carallo. Passenger  – Songs for the drunk and broken hearted. Fiona Apple  –  Fetch the bolt cutters. Dua Lipa – Future Nostalgia. Depedro – Érase una vez. Bifannah – Danças Líquidas. Nada Surf  – Never not together.  Sidonie – El regreso de Abba. A banda da loba – Fábrica de luz.  Guadi Galego – Costuras. Carolina Durante – Carolina Durante. Vanesa Martín – Siete veces sí.  Travis –  10 songs. Rammstein – Live aus Berlín. Austra – Hirudin.  Saint etienne – Tales from turnpike house. Teenage Fanclub – Howdy!.Rozalén – Cuando el río suena. Iván Ferreiro – Cena recalentada. Nathy Peluso –  Calambre. 

Lista Reprodución Fórum: Ultreia Peregrina

Ultreia Peregrina é o novo Ciclo Temático que abordaremos durante o primeiro trimestre do ano 2021 na Biblioteca Fórum Metropolitano.

Con motivo da celebración do Xacobeo este ano 2021, dende a Biblioteca Forum Metropolitano propoñémosvos chegar a Compostela a través dunha selección de lecturas, música, películas ou podcast distribuídas en sete etapas, onde poder  coñecer máis a fondo o camiño a Compostela. Tedes toda a información do ciclo na nosa web.

Cartel_vertical_fotografiaA Lista de Reprodución desta volta como non podía ser doutro xeito está composta por unha serie de cancións que pensamos que poden  inspirar a quen decida emprender o camiño ben sexa de xeito presencial ou virtual. Seleccionamos unha gran variedade de cancións para axudarche non só a facer este longo camiño, senón tamén para dar renda solta á túa imaxinación e axudarche a desconectar da realidade por momentos, porque diso tamén vai o Camiño.

Comezamos co grupo Ialma formado por catro vocalistas mulleres: Verónica Codesal, Natalia Codesal, Magali Menéndez e Marisol Palomo. Catro namoradas de Galicia. Vivindo en Bruxelas, manteñen un vínculo vital con Galicia, a súa patria e principal fonte de inspiración artística. As voces tradicionais caracteríticas das cantareiras fusiónanse con sons, melodías e arranxos máis modernos, dando cancións moi frescas e vivas, que son unha combinación intelixente para unha renovada música universal con algunhas conexións célticas. No seu quinto traballo Camiño de Bruxelas a Santiago, nótase máis a mestura de culturas para así mostrar unha Galicia aberta, unha Galicia que vaia ao encontro de todas as culturas e todas as linguas.

Ialma live at Brussels – Muziekpublique

E se do camiño falamos non pode faltar Luar na Lubre co seu disco Extra Mundi no que reflexan como saíron a dar unha volta por algúns dos países onde a súa música foi acollida. Así, ademais de reinterpretar algúns temas tradicionais da súa terra, viaxan a Portugal, o País Vasco, Asturias, a Gran Bretaña, Catalunya e o País Valenciano, onde fan unha versión algúns dos temas máis populares dos seus respectivos cancioneiros. En conxunto, esta selección de versións mantén a personalidade propia de Luar na Lubre a pesar da disparidade das súas procedencias. Unha personalidade moi ben traballada, cun estilo folk moi depurado, sen estridencias.

Recuperamos Benzón, o primeiro traballo en solitario de Guadi Galego que ofrece unha mestura de música tradicional e de autor en clave folk, jazz e pop. Segundo a propia Gaudi ” Benzón é hiperenxebrismo. O que di a xente do pobo cando está moi agradecida”.

Andrés Suárez – Pequeña Historia de Marina (Lyric Video)

Na lista podes atopar música moi ecléctica e de todos os estilos musicais, dende Mi pequeña historia do cantautor ferrolán Andrés Suárez, á fadista Dulce Pontes aos Zënzar de Cerceda ou o histórico grupo de hip hop Dios Ke Te Crew co seu terceiro disco O ciclo da serpe. E por suposto a selección musical do Camiño inclúe Santiago do compostelán Fredi Leis tan en boca por ser parte da banda sonora da serie “3 Caminos” pero que xa iniciou a súa carreira musical no 2013 na plataforma dixital Soundcloud, conseguindo miles de reproducións nas súas cancións. Os seus primeiros concertos foron en Santiago, na sala Soar e, aos poucos, foi crecendo ata encher a sala Capitol.

O peche poñémolo con Lodo de Xoel López, pertencente ao seu álbum Sueños y Pan (2017) e que forma parte da BSO da campaña turística do Xacobeo 2021. Aquí vos deixamos a Lista ao completo que tamén podedes escoitar a través da nosa canle de spotify e lembrade que moitos dos discos están dispoñibles na Biblioteca Fórum para que os levedes en préstamo.

Andrés Suárez – Mi pequeña historia. Lamatumbá – Paraugas Universal. Dulce Pontes  –  Peregrinaçao. Ialma – Camiño de Bruxelas a Santiago. Luar na Lubre – Extra Mundi. Los Suaves – Esta vida me va a matar. Fredi Leis – Neón.  Xabier Díaz – Noró. Amancio Prada – Trovadores, místicos y románticos.  Rosa Cedrón – Nada que perder. Raiceiras – Raiceiras. Sés – Rabia ao silencio.  Carlos Núñez –  A Irmandade das Estrelas. Milladoiro – Iacobus Magnus. Guadi Galego – Benzón.   Xoel López – Si mi rayo te alcanzara. Luz Casal – Un mar de confianzaZënzar – Vaise armar. Dios Ke Te Crew – O ciclo da serpe. Mago de Oz –  The best oz. 

Lista Reprodución Fórum: polo Nadal voltan os clásicos

De seguro que somos moitos os que estamos desexando que remate este 2020 tan atípico e dé comezo un novo ano máis cheo de esperanza ca nunca. Sexa como for o certo é que a conta atrás xa está en marcha e o Nadal á voltiña mesmo da esquina. Nas bibliotecas municipais xa están listas a mostras de nadal cunha estupenda selección de fondo bibliográfico para que desfrutedes nas vosas casas ademáis da xa tradicional “Guía de Nadal” chea de ideas para aos que vos gusta agasallar cultura, porque un libro, unha película e por suposto un bo disco son o mellor dos agasallos.

A lista de reprodución deste mes quedou do máis ecléctica en canto a sons e artistas pero ten un claro fío condutor, o da nostalxia. E é que polo nadal sempre voltan os clásicos.

Resulta inevitable non comezar a ritmo dos Beatles coa efeméride do aniversario da morte de John Lennon. O 8 de decembro de 1980 John Lennon foi asasinado na porta da súa casa en Nova York. No 40º aniversario deste suceso que sacudiu ao planeta enteiro, as homenaxes sucédense polas miles de emisoras do planeta. En Bibliosons abrimos a nosa lista con el.

O momento nostálixico segue co cantautor e multinstrumentista irlandés, Van Morrison, que leva triunfando desde os anos sesenta e con máis de 30 discos ás súas costas é un dos máis grandes da música ao que, sempre que a ocasión o merece, lle facemos un sitiño na lista. E dun dos grandes a outro dos grandes, o cantautor Leonard Cohen coa súa especial sensibilidade para as letras. Cohen foi máis popular como cantautor que como poeta, pero, paradoxalmente, recoñecéuselle máis esta última faceta que a primeira. Como cantante recibiu o Crystal Globe en 1988 por vender cinco millóns de discos fóra de Estados Unidos. Con todo, en literatura, a lista de galardóns cultivados é case interminable; mereceu dous títulos Honoris causa polas universidades de Dalhousie (1970) e McGill (1992), e en 2011 recibiu o Premio Príncipe de Asturias das Letras.

Incluímos tamén a Michael Jackson, Rod Stewart, Adele, Björk, Norah Jones ao gran Barry White e non nos esquecemos da polifacética Barbra Streisand, a muller que triunfuou pese a todo e a todos. Actriz, cantante, compositora, produtora e directora estadounidense. Ao longo da súa extensa carreira de máis de seis décadas, os seus logros na música, o cinema e o teatro convertérona nunha icona da cultura estadounidense.

A lista como xa adiantabamos é acaída para todos os gustos e desexamos que a escoitedes ao ritmo dos mellores desexos para este ano 2021 que está a piques de comezar. Deixámosvola ao completo para que a escoitedes tamén na nosa canle de spotify pero non sen antes despedirnos coa icónica canción “Viva la vida” porque diso, máis ca nunca vai a cousa. E lembrade que tedes todos os discos ao voso dispor na Biblioteca Fórum Metropolitano.

The Beatles – Sgt. Pepper’s Lonely Hearts Club Band, Imagine Dragons – Night Visions, Van Morrison – You’re Driving Me Crazy, Björk – Homogenic, Niño Josele – Paz, Coldplay – Viva la Vida, Rod Stewart – The Complete Great American Songbook, Michael Jackson – Blood On the Dance Floor – Mumford & Sons – Babel, Diana Krall – Wallflower, Norah Jones – Day Breaks, Adele – 19, Carla Bruni – No promises, Leonard Cohen – Songs from the road, Barbra Streisand – The concert, Vanesa Martín – Munay, U2 – No line on the horizon, Robbie Williams – She’s Madonna, Barry White – The ultimate gold collection, Simply Chillout – Simply Chillout.

Lista Reprodución Fórum: Outono a ritmo de música galega

Coma quen non quere a cousa pero expremendoo ao máximo pasou xa o verán, chegan as chuvias, a caída da folla e comezana refrescar os días. Estamos no outono, época para moitos de cambios e novos propósitos pero época tamén nostálxica coa que na Lista de Reprodución de Fórum volvemos á carga, desta volta facémola con música galega. Os seguidores do blog poden dar boa conta que dende Bibliosons apoiamos e visibilizamos a música e os artistas da terra. Con esa mesma idea creamos físicamente na Biblioteca Fórum unha sección de música en galego onde poderedes atopar cedés tanto de artistas galegos coma de que aqueles que cantan en galego. A lista podería ser longa pero coma sempre facemos escolla de 20 traballos que xa tedes listos para poder levar en préstamo.

Comezamos cos composteláns Novedades Carminha e o seu disco “Juventud infinita” onde podemos desfrutar da súa esencia garaxeira, toques descarados e canallas nas letras e temas moi pegadizos. O vídeo do single que leva o mesmo nome do disco foi estrenado por un medio tan importante como El País. Novedades segue estando de plena actualidade co seu hit “Mucho nivel”. Nós  abrimos boca con “Quiero verte bailar”.

Sen marchar de Compostela aproveitamos para facernos eco de Fredi Leis, intérprete, músico e compositor que desde pequeno empeza a tocar o piano de maneira autodidacta. Fredi Leis postúlase como unha das promesas da canción de autor renovada. Dáse a coñecer en Souncloud conseguindo centos de miles de escoitas e percorre salas e teatros do circuíto nacional de cantautores. Xa está dispoñible o single “Nivel experta” do que será o seu próximo disco que verá a luz no 2021. Namentras quedamos con “Mariposas” do seu traballo Neón.

Seguimos cunha das grandes revelacións da música galega e española dos últimos tempos, a ourensá Marem Landson. Filla de nai galega e o famoso baloncestista Willie Ladson.Tras debutar na primavera de 2018, cun primeiro álbum homónimo que cultivou críticas entusiastas, Marem, participou nunha infinidade de festivais ( FIB, Vida, Noroeste, Sinsal, Ribeira Sacra, Ewan Fest…). Un primeiro disco gravado con tan só 19 anos e composto por once cancións que se pasean polo pop, o rock e o folk. Landson ten influencias clásicas pero un son contemporáneo ao que acompaña de moita personalidade.

E con mulleres continuamos, concretamente co cuarteto de indie-rock  do Barbanza Agoraphobia. A banda nace no ano 2006, coma un cuarteto de amigas de instituto que compartían o gusto pola música punk e as ganas de facer as súas propias cancións. As Agoraphobia recén acaban de tocar no Festival da Luz. Na lista rescatamos o seu traballo “Incoming Noise”, un disco contemporáneo no que podemos desfrutar de dez cancións nas que conflúen distintas tendencias pero cun marcado carácter rock.

Neste outono musical a ritmo de música galega podes desfrutar ademáis de artistas tan dispares coma Davide Salvado, Los Suaves, Narf, os rapoemas da viguesa Aíd, o gran Iván Ferreiro, voltar ao sempre rememorable Deluxe co seu “Los jóvenes mueren antes de tiempo”, etc. E por suposto non queriamos deixar pasar a ocasión para render a nosa pequena homenaxe a gran Ana Kiro cando se acaban de cumprir, o pasado 24 de setembro, 20 anos do seu pasamento.

Coma sempre aquí vos deixamos a lista ao completo para que a escoitedes con ansia e ganas de bailar na nosa canle de spotify. Podedes consultar a súa dispoñibilidade no catálogo e vir a recollelos á Biblioteca, agardámosvos!!

Lista Reprodución Fórum: Outono a ritmo de música galega

Ana Kiro – Toda unha vida,  Jane Joyd – Shy Little Jane Presents, Marem Ladson – Marem Landson, Alba María –  Aínda, Tanxugueiras – Tanxugueiras, Iván Ferreiro – Casa, Cepeda –  Nuestros Principios , Fredi Leis – Neón, Novedades Carminha – Juventud Infinita, Miriam Rodríguez – Cicatrices, Agoraphobia  – Incoming Noise, Hard GZ, Tee Amara – Versus,  Davide Salvado – Lobos, Deluxe – Los Jóvenes Mueren antes de Tiempo, Los Suaves – Maldita sea mi suerte, Budiño – Fulgor, Narf – Nas Tardes Escuras, Aíd – Rapoemas, Luz Casal – La pasión, Xabier Díaz – Noró

PerVersións: un tributo á tradución

A música é a linguaxe internacional que mellor comprendemos. Ten a capacidade de transportarnos, de facernos vibrar, de emocionarnos… sen que sexa necesario entender a súa letra. Non importa o país no que vivas ou cantos idiomas domines. Afortunadamente, tamén existen multitude de cancións que foron versionadas noutros idiomas, un traballo no que os tradutores e tradutoras deixaron o seu legado incuestionable.

O vindeiro 30 de setembro festexamos o Día Internacional da Tradución, data na que se conmemora o falecemento de Jerónimo de Estridón, tradutor da Biblia e patrón deste gremio. En 1991 a FIT (Federación Internacional de Tradutores) propuxo un día internacional oficialmente recoñecido para render tributo ao labor dos profesionais lingüísticos e ao importante papel que desempeñan en achegar ás nacións e facilitar o diálogo, o entendemento e a cooperación. Labor de indiscutible peso na industria musical: son moitas as cancións que permanecen no imaxinario global e foron traducidas ao idioma de cada lugar para, dese xeito, entrar a formar parte da súa propia cultura. A mesma melodía, as mesmas notas musicais, a mesma mensaxe, pero nun idioma distinto. E se ben algunhas versións orixinais son insuperables, existen versións traducidas que son tan boas ou como as xenuínas, e algunhas que ata entran no terreo do inclasificable.

Desde as Bibliotecas Municipais sumámonos a este tributo á tradución con PerVersións, unha nova playlist que recompila tanto as cancións máis traducidas da historia como versións que destacan pola súa calidade pese a non ser concibidas nesa lingua.

“Mr. Rod Stewart: ¡gracias!”

A inconfundible “Bésame mucho” foi escrita pola compositora e pianista mexicana Consuelo Velázquez, e non tardou moito en converterse nunha das cancións máis populares do século XX. Co tempo, a canción foi pasando duns artistas a outros con diferentes adaptacións, sendo a versión inglesa dos Beatles unha das máis coñecidas.

A peza principal pola que se recoñece ao gran Frank Sinatra, “My Way”, ven dunha canción orixinal francesa, “Comme d’habitude” de Claude François e Jacques Revaux. O tempo converteuna en todo un símbolo musical e cultural, sendo interpretada por cantantes de todo o mundo. A primeira versión en español de “A mi manera” foi interpretada por Estela Raval nos anos 70.

A bossa nova “Garota de Ipanema” é outra canción mundialmente traducida. Escrita en 1953 por Vinícius de Moraes e composta por Antonio Carlos Jobim, quen a popularizou e xerou que a canción dese a volta ao mundo foi o magnífico Joao Gilberto. Foi versionada por famosos cantantes de todo o mundo e interpretada en ritmos tan diferentes como o jazz, blues, rock e pop.

Mención especial merece “Omega”, de Enrique Morente e Lagartija Nick. Considerado disco de culto, adapta poemas de García Lorca e cancións do canadense Leonard Cohen. A súa versión do “Pequeño vals vienés” é unha das grandes xoias dos anos noventa.

E para darlle un toque máis sorpresivo á escoita, PerVersións nútrese tamén de diversos artistas patrios que no seu día quixeron probar sorte no mercado internacional recreando os seus hits noutros idiomas.

Velaquí a nosa “perversa” homenaxe a unha profesión que se volveu fundamental, tanto por esixencias da globalización como por converterse nunha ponte entre as culturas. O calado musical é só unha das súas múltiples facetas: non esquezamos que grazas ao traballo dos tradutores e tradutoras podemos mergullarnos nunha película, emocionarnos coa literatura e explorar territorios que van máis alá das palabras.

Le, viaxa, soña…

Neste verán tan extraño postconfinamento queremos pouco a pouco volver á normalidade e unha desas normalidades é o noso ciclo de verán.  Este ano títulado “LE, VIAXA, SOÑA…” e mentras lemos podemos viaxar  e soñar acompañados da lista de reproducción que elaboramos para tí e que  seguro non che vai a deixar  indiferente.

 A música ten a capacidade de darnos unha sacudida e espabilarnos cando máis o necesitamos. De feito hai cancións e ritmos que escoitamos e que nos devolven a enerxía de maneira case automática. Hai melodías que según a ciencia teñen os elementos que o noso cerebro necesita para recuperar o ánimo. Calquera melodía que che faga sorrir, que che inspire bailar, bo rollo , ou simplemente che relaxe , vai ser boa para ti. Cando teñas un día gris , convence ó teu humor de que cambie de rumbo con boa música, esa que nos axudou tanto no confinamento.

Música e felicidade están intimamente ligadas, chega o momento de que prepares o cerebro para unha dose de enerxía positiva a través destes temas que recopilamos para ti nesta lista de Spotify.

Faremos un percorrido polos grupos e cantautores da xeografía española, remontaremonos a outras décadas ata chegar á actual, tocando diversos xéneros como pop, indi, alternativa, rap, etc…

Creamos unha lista con temazos tan pegadizos que, sen querer, meteranse na túa mente todo o día e non poderás evitar cantaruxar e bailar coma “Tigre de Bengala” de Xoel López, unha canción do máis alegre e que dá nome ó seu novo álbum , pasando polos grupos  miticos do pop dos 80 como Los Piratas, Radio Futura, Seguridad social, Heroes del Silencio…. Recordamos a Pau Donés coa a súa derradeira  canción “Eso que tu me das” e non pode faltar irmos de “Verbena” con Novedades Carminha. Sacudiremos os nosos medos con Rosana Arbelo “Sin miedo” e tamén nos engancharemos á vida con Guadi Galego “Chea de Vida”

 

Desexamos que esta lista sexa a vosa compañeira do verán e vos faga pasar un intre divertido co que bailar ou quizais relaxarvos, en definitiva que sexa capaz de transportarvos alí onde queirades, da primeira á última das cancións

Dalle ao play e que empece a soar a música!!!

 

 

Escoita con Orgullo: as Municipais entenden

Pese a que sempre mantivo unha relación subversiva e enriquecedora coa sexualidade, a música non debería ser catalogada como gai ou hetero. Non hai necesidade de adxudicarlle máis etiquetas que as do propio xénero musical, xa sexa pop, rock, indie ou reguetón. Agora ben, é innegable que moitas cancións, ben por ser un canto á tolerancia, ó amor libre ou á diversidade, serviron para que a comunidade LGTBI puidera sentirse identificada ou empatizase coa súa mensaxe.

Avecíñase o Día Internacional do Orgullo LGTBI e nas Bibliotecas Municipais levamos a cabo diferentes accións que conmemoran, reivindican e festexan ese orgullo. A dignidade como resposta á exclusión, ás agresións ou a calquera tipo de discriminación que vulnere os dereitos das persoas que aman con liberdade. Unha destas iniciativas vén en formato musical: na playlist As Municipais Entenden facemos un percorrido por esas cancións orgullosas de manter algún vínculo co colectivo, desde grandes clásicos convertidos en himnos a temas máis actuais.

O 28 de xuño de 1969, a comunidade LGTB defendíase do reiterado acoso policial en Stonewall, un local de ambiente neoiorquino. A rumoroloxía afirma que cando comezaban as protestas sonaba de fondo Over the rainbow, de Judy Garland, convertíndose así na bandeira da comunidade, no símbolo dunha actitude de vida. Os “amigos de Dorothy” decidiron non tolerar máis humillacións e apostaron por ese mundo mellor, máis aló do arco da vella, no que reinan a liberdade e o respecto. Estes disturbios supuxeron un punto de inflexión na loita a favor dos dereitos civís das persoas homosexuais de todo o mundo.

En 1970 The Kinks lanzaba Lola, unha crónica sobre un encontro romántico entre un mozo e un travesti ao que coñece nun pub do Soho londiniense. A canción abordou a mobilidade de xénero (quen non se namorou da deliciosa ambigüidade de Lola?) e cuestionou a solidez da masculinidade. Nesta lista de reprodución atoparás tamén a estupenda versión en español que no ano 2004 publicou M Clan.

E se The Kinks expuxo a mobilidade de xénero, o excéntrico Prince encargouse de perpetrala. Sign ‘O’ The Times, álbum que contén If I was your girlfriend, é unha obra conceptual onde o compositor adoptou o personaxe e a voz dunha muller. Os rexistros vocais de Prince foron modificados ata alcanzar un agudo moi próximo á voz feminina: unha especie de “transexualismo musical” nun álbum tan barroco, erótico e psicodélico como o seu creador.

​En moitas ocasións a falta de liberdade e de equidade nos dereitos da comunidade LGTBI combatíase con imaxinación, carisma e performance descaradas. Un exemplo disto son os irreverentes Queen: nas nosas mentes quedou gravada para sempre a imaxe de Freddie Mercury vestido de muller e pasando o aspirador ao canto de I want to break free. Non podemos esquecer tampouco aos Village People e a súa canción máis famosa, YMCA, convertida en todo un himno. E convertidos tamén en himnos, aínda que escritos sen ese propósito, incluímos temas clásicos como I’m coming out, Believe, A quién le importa, Vogue ou Express yourself .

Achegámonos ao panorama máis recente cunha serie de cancións imprescindibles nesta lista: unha delas é Firework, de Katy Perry, cuxo vídeo foi dedicado ao movemento internacional It Gets Better, que loita contra o acoso á mocidade LGTB. Destacamos tamén Bisexual, do grupo madrileño Cariño, unha proclama pop sobre a bisexualidade na que o amor foxe de tópicos e imposicións: “Me gustan las chicas, ¿cómo pudo pasar? Me gustan las chicas, no me lo puedo explicar. Será por su pelo o por su forma de mirar, pero en ese chico yo no dejo de pensar”.

Na mesma liña anti-tópicos atopamos a Rodrigo Cuevas, que se autodefine como un “axitador folclórico”. Este cantante e compositor tira de humor e provocación para facer chegar unha mensaxe que, no fondo, ten moito de seria: a reivindicación da cultura local. A súa música é  “synth folk, cantiga glam e cabaret underprao”. Ou o que é o mesmo: canción tradicional travestida, sintetizadores e moita visibilidade queer.

Esta proposta musical tan diversa non é gai. Como cantaría Juan Valladares, “no decirle mariquita”. É inclusiva, sensibilizadora e combativa. Traza un camiño de baldosas amarelas que pon rumbo a un lugar no que a sexualidade é libre e a identidade nunca é cuestionada. Xa nolo advertiu a propia Dorothy: “se camiñamos o suficiente, algunha vez chegaremos a algunha parte”.

Día da Música 2020

Iniciada en Francia en 1982 como “Festa da Música” e instituida como celebración europea en 1985 (Ano Europeo da Música), cada solsticio de verán, o 21 de xuño, a Unión Europea celebra unha xornada destinada a promover o intercambio cultural entre os pobos. O seu obxectivo é promocionar a música de dúas maneiras: a primeira, que os músicos afeccionados voluntariamente saian a tocar á rúa. A segunda, a organización de concertos gratuítos, nos que o público teña a oportunidade de presenciar directos dos seus artistas preferidos sen importar estilo nin orixe.

Este ano a situación é ben distinta e os efectos da COVID-19 na música aínda perduran impedindo que se poidan celebrar macro festivais e espectáculos musicais polos diversos escencarios do noso país. Na cidade o novo encontro coa música é  no teatro Colón da man do director convidado José Trigueros ás 12:30. Dentro da comunidade temos que viaxar ata Compostela para atopar concertos que festexen o Día da Música. A Cidade da Cultura organiza tres de pequeno formato a cargo de: El afecto ilustradoFAIA e Chisme, que se celebrarán ao longo de toda a xornada. Trátase da primeira programación cultural do Gaiás que contará con público, tras a cancelación deste tipo de actividades pola alerta sanitaria.

Cartel oficial do Día da Música no Gaiás

Pasado o día da música, a pesar de que a crise do coronavirus paralizou case por completo a industria musical, tres meses despois do inicio do confinamento, moitos músicos galegos xa empezan a programar os seus primeiros concertos aínda que con certas limitacións e as medidas sanitarias correspondentes. Axendas das que queremos facernos eco.

O 4 de xullo no Auditorio Pazo da Cultura de Pontevedra a cita é con Xabier Díaz e as Adufeiras de Salitre xunto a Guadi Galego. Aínda que a Guadi doulle tempo de facer a xira de “Immersion”, editado en outubro do 2019, non lle aconteceu o mesmo a Xabier Díaz. O seu traballo “As catedrais silenciadas” apareceu en escena no arranque da crise do coronavirus polo que a xira viuse truncada.

Pola súa banda, a artista coruñesa María Jesús Cabana, Astrogirl, estará en concerto en Ferrol o 17 de xullo presentando o seu disco TORO. Para quen aínda non a coñeza, no 2018 formou banda e quedou semifinalista no concurso Proyecto Demo de Radio 3, tocou no Festival Noroeste EG e no Festival da Luz, ademais de pisar escenarios de salas como Capitol (SDC), Mardi Gras ou Baba Bar (A Coruña).  Ademais colaborou con Nacho Vegas en directo en varias ocasións e no 2019 quedou finalista no concurso Sonidos Mans.

Triángulo de Amor Bizarro confirmou tamén actuación o 17 de xullo pero en Barcelona dentro de en Nits del Primavera, un ciclo organizado polo festival Primavera Sound, cancelado este ano e no que o grupo de Boiro era habitual no seu cartel. O coruñés Xoel López fixo o propio e confirmou que formará parte da Crew Nation, unha serie de directos na sala Riviera de Madrid.

No ciclo de actuacións especiais que acollerá no verán a terraza do Auditorio Mar de Vigo, o Festival TerraCeo, do que Los Secretos serán os encargados de  inaugurar o 3 de xullo, poderemos desfrutar, entre outras,  das voces do ferrolán Andrés Suárez e outros músicos como Pablo López, Ariel Rot, Álex Ubago, Coque Malla ou Don Patricio. Neste caso, os atardeceres con música e vistas ás Cíes estarán adaptados ás condicións sanitarias da nova normalidade e prolongaranse ata finais de setembro.

E non nos esquecemos da nosa aprezada Silvia Penide que recentemente foi noticia por ofrecer concertos nas ‘leiras’ dos seus seguidores no verán. A cantautora anunciaba a través das súas redes sociais, onde foi moi activa durante o confinamento, esta particular forma de facer chegar a súa música ás casas dos seus fans, ás que pode ir “soa ou acompañada polos músicos da banda” dicía.

Así que, a pesar de todo o vivido nestes meses, xa sabedes, opcións musicais hai e oxalá poidamos moi pronto desfrutar da música ao vivo sen restriccións de ningún tipo. Mentres tanto, dende Bibliosons propoñemos desfrutar da música sexa no formato que sexa durante este día da música e todos os días como unha canle que nos axuda a conectar coas nosas emocións e en moitas ocasións pode chegar a ser a mellor terapia. Estedes onde estedes, dádelle ao “play” e desfrutade da nova lista de reprodución especialmente preparada para o Día da Música. Podédela atopar na nosa canle de Spotify.

De Película: as mellores BSO

Fai uns días coñecíamos a noticia de que John Williams e Ennio Morricone, dous dos compositores de bandas sonoras máis importantes da historia, son os galardoados co Premio Princesa de Asturias das Artes 2020. Williams conta xa con cinco premios Óscar na categoría de mellor banda sonora orixinal por El violinista en el tejado, Tiburón, La Guerra de las Galaxias, E. T. e La lista de Schindler, ademais de deixar pegada no imaxinario colectivo grazas ás bandas sonoras de películas como Parque Jurásico, Indiana Jones ou Harry Potter, entre moitas outras. Morricone é un dos compositores cinematográficos máis prolíficos do mundo: conta con máis de catrocentas bandas sonoras para cinema e televisión, entre as que destacan as de películas como La misión, Cinema Paradiso, El bueno, el feo y el malo ou Por un puñado de dólares. En 2007 recibiu o Óscar honorífico a toda a súa carreira, e case unha década máis tarde facíase co galardón pola banda sonora composta para Los odiosos ocho, o peculiar western de Quentin Tarantino.

Todos estaremos de acordo en que custa imaxinarse unha película ou unha serie de televisión que careza de música. Sen efectos sonoros, cabeceiras ou sintonías, os silencios darían unha estraña sensación de baleiro e lentitude. O seu gran poder fixo dela un instrumento que leva máis dun século utilizándose para reforzar aquilo que se desexa transmitir na industria audiovisual. Antes de que o cinema fose sonoro, xa había unha interacción entre este e a música. En moitas salas había pianos, ou mesmo orquestras enteiras, que tocaban música en directo, acompañando á acción que transcorría na pantalla. A primeira banda sonora como tal da que se ten constancia data de 1908. Camille Saint-Saëns compuxo unha peza para a película francesa El asesinato del Duque de Guisa. Nese mesmo ano, o ruso Mikhaíl Ippolítov-Ivánov compoñía outra melodía para o filme Stenka Razin.

A día de hoxe, as bandas sonoras son case tan importantes como as propias películas. Transforman o mundano en máxico, engaden vigor e riqueza ás imaxes e transpórtanos a outra realidade. Os sons modelan a atmosfera do filme, recrean épocas e lugares, e achegan un significado aos personaxes, aos diálogos e ao argumento que non se acadaría doutro modo. Mesmo a experiencia emocional é diferente: a música inflúe nas nosas sensacións, modificando o sentido da imaxe ou anticipando unha situación determinada. Quen non asociaría, por exemplo, o fondo musical da escena da ducha de Psicosis co que vai ocorrer? Ou imaxinas a Marcha Imperial de Star Wars sen a aparición de Darth Vader?

De Película é o nome da nova playlist que vos ofrecemos en Spotify, na que facemos un percorrido polas bandas sonoras imprescindibles que forman parte da historia do sétimo arte. Aos temas instrumentais dos citados galardoados sumámoslle os de Hans Zimmer (Piratas del Caribe, Gladiator, El Rey León…), James Horner (Titanic, El Zorro, Avatar…), Ramin Djawadi (Juego de Tronos) e Howard Shore (El Señor de los Anillos), entre outros.

Tamén son parte desta lista diversas cancións incluídas en filmes que alcanzaron un estatus inesperado e se converteron en títulos de culto case sen pretendelo: Footloose, Pretty Woman, La princesa prometida, Pulp fiction, Kill Bill

O cine de súper heroes marca unha forte tendencia desde fai anos. Pasou de ser un subxénero máis das películas de aventuras e fantasía a converterse no maior activo da industria. Desde as primeiras historias de Batman ata os máis recentes Vengadores, esta lista compila algunhas mostras sonoras das aventuras nadas nos cómics.

E non poderiamos falar da música e as súas funcións no cinema se non temos en conta o musical como un xénero cinematográfico en se mesmo. En De Película contamos con temas que forman parte dos musicais máis importantes da historia: El mago de Oz, Cantando bajo la lluvia, West side history, Grease, Moulin Rouge, La,la,land…

Unha antoloxía de bandas sonoras que foron capaces de traspasar a pantalla e transcender ás películas para as que foron creadas. Luces, cámara…. e play!!