Lista Reprodución Fórum: o mellor do 2021

Coa conta atrás botada a andar para o remate do ano, nas Bibliotecas Municipais da Coruña xa están preparadas as mostras de Nadal cunha estupenda selección de fondo bibliográfico para que desfrutedes nas vosas casas ademáis da xa tradicional guía “Historias de Regalo 2021” chea de propostas das bibliotecarias e bibliotecarios para os que vos gusta agasallar cultura, porque un libro, unha película e por suposto un bo disco son o mellor dos agasallos para desfrutar con todos os sentidos.

Historias de Regalo 2021

Na Biblioteca Fórum Metropolitano tedes tamén ao voso dispor unha selección de materiais que conforman o mellor do ano 2021. Libros, cómis, películas e por suposto música. Todos foron publicados e/ou incorporados ao longo deste ano ao noso fondo pero que de seguro, entre tanta oferta moitos deles aínda non pasaron polas vosas mans. E diso mesmo vai a derradeira lista de reprodución do ano, do mellor que chegou aos nosos ouvidos este 2021.

Falamos por exemplo de Crossroads, unha caixa recompilatoria do músico británico Eric Clapton. O álbum recompila o seu traballo en solitario xunto á súa carreira dentro dos grupos The Yardbirds, John Mayall’ s Blues Breakers, Cream, Blind Faith, Delaney & Bonnie e Derek and the Dominos. Crossroads inclúe tamén varias actuacións en directo e gravacións de estudo inéditas.

Tamén chegou ás nosas mans Love álbum gañador do premio Grammy na categoría de mellor recompilación para banda sonora para película, televisión ou outro medio visual, que contén un remix dos temas máis coñecidos de The Beatles e é a banda sonora do show do Cirque du Soleil co mesmo nome.

Recordamos que como apertura do 2021 o británico Mike Rosenberg ou o que é o mesmo Pasenger estreou Songs for the Drunk and Broken Hearted, o seu décimo terceiro disco de estudo, o seu duodécimo en solitario desde a disolución da banda que dá nome ao artista. E digo eu queda alguén que non tarareara o seu famoso hit Let Her Go? Pois non vos perdades o último que conta con todas as papeletas para converterse na banda sonora perfecta dunha tarde nostálxica de inverno.

A lista coma sempre intentamos que sexa apta para todos os gustos,  recopilamos dende a intensidade emocional de The Killers en Pressure Machine, a mellor das armas, Future Nostalgia da nova diva do pop actul Dua Lipa, o incrible talento que disco a disco demostra a catalana María Rodés, neste caso falamos de Lilith.

Aquí vola deixamos ao completo para que a escoitedes tamén na nosa canle de spotify e desexamos que o fagades ao ritmo dos mellores desexos para este ano 2022 que está a piques de comezar.

The Strokes– Room fire, Passenger – Songs for the drunk and broken hearted, Foo Fighters– Medicine at midnight, Dua Lipa – Future Nostalgia, Eric Clapton – Crossroads, The Beatles – Love, Fiona Apple– Fetch the bolt cutters, María Rodés– Lilith – Malandrómeda– Cada can que lamba o seu carallo, La M.O.D.A.– Ninguna ola, Lina Rodrigues– Lina_Raul Refree, Ginebras – Ya dormiré cuando me muera, The Killers– Pressure machine, Little Simz– Sometimes i might be introvert, Coro Infantil Xuvenil Cantabile – Palabras de luz, Bifannah – Danças líquidas, All & Always – Just plug into the rock, Superfuzz – Superfuzz, Escuchando Elefantes– ¿Por que siempre cantáis en inglés?, Silvia Penide – Los días de plomo.

Lista de reprodución Fórum: últimas novidades

Se non o fixestes xa, botádelle unha escoita á nova Lista de Reprodución do mes de maio da Biblioteca Fórum. Desta volta ven cargada coas últimas incorporacións musicais que van dende o rock alternativo dos estadounidenses Nada Surf ata a mestura de  pop, blues, folk, rock e sons tradicionais creando un estilo musical de seu de A Banda da Loba.

Fabrica de luz é o traballo que podes escoitar na lista de reprodución deste mes. Un canto á creación e á liberdade e toda unha declaración de intencións  no que a banda xa se aproxima á obra da homenaxeada nas letras Xela Arias coa canción Tigres coma cabalos. Trátase dun bolero que tamén aparecerá no novo traballo recén publicado Hasme oír esta vez coa incorporación da voz de Xacobe Varela, cantante do grupo Os d’Abaixo. Hasme oír é  unha homenaxe máis coidada e precisa. Contén catro cancións, unha por cada poemario: Intempériome, Darío a diario, Denuncia do equilibrio e Tigres coma cabalos, así como uns interludios musicais recitados entre cada un deles.

A banda da Loba – Tigres coma cabalos (Folk Sessions)

Cun concerto en streaming para todo o seu público comezaba Passenger o ano. Unha gran iniciativa por parte do artista para que todo o mundo poidera velo en directo, xa que o panorama actual impide aínda poder gozar dun concerto como os de antes. Un concerto onde  interpretou todos os seus éxitos e todos os deste novo traballo, Songs For The Drunk And Broken Hearted que dende a biblioteca xa tedes dispoñible para levar en préstamo. Pero para os máis seareiros non perdades a esperanza aínda porque se as condicións da pandemia o permiten, Passenger, pasará por España na xira de presentación do seu álbum. Farao en dúas datas: o 12 de outubro na sala A Riviera de Madrid; e o día 13 na sala Razzmatazz de Barcelona.

Passenger | A Song For The Drunk And Broken Hearted (Official Video)

Seguimos cunha auténtica estrela do pop aos seus 25 anos. a cantante albano- kosovar Dua Lipa, leva desde os 14 anos adicándose ao mundo da música. Luz, cor e música disco son os elementos fundamentais que atoparás no seu último traballo Future Nostalgia.

Dua Lipa: Future Nostagia. Portada do disco

E voltamos á terra coa orixinal banda de Vigo Bifannah e o seu  segundo traballo Danças líquidas. Son orixinais ata no nome en homenaxe a unha comida portuguesa, pan recheo de carne de porco, “bifana” moi típido de Porto, onde Guille (voz e guitarra) vivíu cinco anos. Na súa música podemos atopar combinación de rock sesenteiro, latín soul e tropicalia.

Bifannah-Capri

Na lista podes escoitar tamén ao madrileño Depedro en xira co seu novo espectáculo Érase una vez Depedro no que busca a interacción coa audiencia. Un gran espectáculo, tanto para nenos como para adultos, a non perder. Sidonie son un clásico xa nas nosas listas, e desta volta veñen con El regreso de ABBA. Son 23 cancións inspiradas na novela homónima publicada polo cantante Marc Ros. Sen dúbida un completo e ambicioso traballo do trío catalán.

Sidonie con Kimberley Tell – Me Llamo Abba

A lista segue con nomes da talla de Nathy Peluso, Saint Etienne ou Travis. Aquí vola deixamos ao completo para que a desfrutedes con calma e se gustades, xa sabedes, podedes levar os discos en préstamo, consulta antes a súa dispoñibilidade no noso catálogo.

Malandrómena – Cada can que lamba o seu carallo. Passenger  – Songs for the drunk and broken hearted. Fiona Apple  –  Fetch the bolt cutters. Dua Lipa – Future Nostalgia. Depedro – Érase una vez. Bifannah – Danças Líquidas. Nada Surf  – Never not together.  Sidonie – El regreso de Abba. A banda da loba – Fábrica de luz.  Guadi Galego – Costuras. Carolina Durante – Carolina Durante. Vanesa Martín – Siete veces sí.  Travis –  10 songs. Rammstein – Live aus Berlín. Austra – Hirudin.  Saint etienne – Tales from turnpike house. Teenage Fanclub – Howdy!.Rozalén – Cuando el río suena. Iván Ferreiro – Cena recalentada. Nathy Peluso –  Calambre. 

Lista Reprodución Fórum: Outono a ritmo de música galega

Coma quen non quere a cousa pero expremendoo ao máximo pasou xa o verán, chegan as chuvias, a caída da folla e comezana refrescar os días. Estamos no outono, época para moitos de cambios e novos propósitos pero época tamén nostálxica coa que na Lista de Reprodución de Fórum volvemos á carga, desta volta facémola con música galega. Os seguidores do blog poden dar boa conta que dende Bibliosons apoiamos e visibilizamos a música e os artistas da terra. Con esa mesma idea creamos físicamente na Biblioteca Fórum unha sección de música en galego onde poderedes atopar cedés tanto de artistas galegos coma de que aqueles que cantan en galego. A lista podería ser longa pero coma sempre facemos escolla de 20 traballos que xa tedes listos para poder levar en préstamo.

Comezamos cos composteláns Novedades Carminha e o seu disco “Juventud infinita” onde podemos desfrutar da súa esencia garaxeira, toques descarados e canallas nas letras e temas moi pegadizos. O vídeo do single que leva o mesmo nome do disco foi estrenado por un medio tan importante como El País. Novedades segue estando de plena actualidade co seu hit “Mucho nivel”. Nós  abrimos boca con “Quiero verte bailar”.

Sen marchar de Compostela aproveitamos para facernos eco de Fredi Leis, intérprete, músico e compositor que desde pequeno empeza a tocar o piano de maneira autodidacta. Fredi Leis postúlase como unha das promesas da canción de autor renovada. Dáse a coñecer en Souncloud conseguindo centos de miles de escoitas e percorre salas e teatros do circuíto nacional de cantautores. Xa está dispoñible o single “Nivel experta” do que será o seu próximo disco que verá a luz no 2021. Namentras quedamos con “Mariposas” do seu traballo Neón.

Seguimos cunha das grandes revelacións da música galega e española dos últimos tempos, a ourensá Marem Landson. Filla de nai galega e o famoso baloncestista Willie Ladson.Tras debutar na primavera de 2018, cun primeiro álbum homónimo que cultivou críticas entusiastas, Marem, participou nunha infinidade de festivais ( FIB, Vida, Noroeste, Sinsal, Ribeira Sacra, Ewan Fest…). Un primeiro disco gravado con tan só 19 anos e composto por once cancións que se pasean polo pop, o rock e o folk. Landson ten influencias clásicas pero un son contemporáneo ao que acompaña de moita personalidade.

E con mulleres continuamos, concretamente co cuarteto de indie-rock  do Barbanza Agoraphobia. A banda nace no ano 2006, coma un cuarteto de amigas de instituto que compartían o gusto pola música punk e as ganas de facer as súas propias cancións. As Agoraphobia recén acaban de tocar no Festival da Luz. Na lista rescatamos o seu traballo “Incoming Noise”, un disco contemporáneo no que podemos desfrutar de dez cancións nas que conflúen distintas tendencias pero cun marcado carácter rock.

Neste outono musical a ritmo de música galega podes desfrutar ademáis de artistas tan dispares coma Davide Salvado, Los Suaves, Narf, os rapoemas da viguesa Aíd, o gran Iván Ferreiro, voltar ao sempre rememorable Deluxe co seu “Los jóvenes mueren antes de tiempo”, etc. E por suposto non queriamos deixar pasar a ocasión para render a nosa pequena homenaxe a gran Ana Kiro cando se acaban de cumprir, o pasado 24 de setembro, 20 anos do seu pasamento.

Coma sempre aquí vos deixamos a lista ao completo para que a escoitedes con ansia e ganas de bailar na nosa canle de spotify. Podedes consultar a súa dispoñibilidade no catálogo e vir a recollelos á Biblioteca, agardámosvos!!

Lista Reprodución Fórum: Outono a ritmo de música galega

Ana Kiro – Toda unha vida,  Jane Joyd – Shy Little Jane Presents, Marem Ladson – Marem Landson, Alba María –  Aínda, Tanxugueiras – Tanxugueiras, Iván Ferreiro – Casa, Cepeda –  Nuestros Principios , Fredi Leis – Neón, Novedades Carminha – Juventud Infinita, Miriam Rodríguez – Cicatrices, Agoraphobia  – Incoming Noise, Hard GZ, Tee Amara – Versus,  Davide Salvado – Lobos, Deluxe – Los Jóvenes Mueren antes de Tiempo, Los Suaves – Maldita sea mi suerte, Budiño – Fulgor, Narf – Nas Tardes Escuras, Aíd – Rapoemas, Luz Casal – La pasión, Xabier Díaz – Noró

Lista Reprodución Fórum: #quedanacasa

Xa falaron as miñas compañeiras en post anteriores da cantidade de movementos que xurdiron por parte da industria musical en torno á pandemia do COVID 19 para poder desfrutar da música en directo dende a casa. Ao longo dos próximos días seguiremos compartindo recursos convosco que de seguro non deixarán de medrar, mais hoxe queremos animarvos a xornada a bo ritmo aínda que non sexa en streaming.

Hoxe volta ao blog a Lista de Reprodución do Fórum máis necesaria ca nunca. A lista de reprodución pode ser unha boa forma de descubrir novos artistas ou simplemente deixarte levar polo son mentres vas facendo outras cousas… seguro que o confinamento che pasa a mellor ritmo!! Desta volta traemos novidades frescas chegadas á biblioteca e que poderedes levar en préstamo cando todo volte á normalidade. Namentras aí vos vai un petisco para ir abrindo boca.

Comezamos moi movidos a ritmo de pop e electrónica da man dos madrileños Miss Caffeina e o seu último traballo Oh Long Johnson, un curioso título que vén dun meme dun gato que parece pronunciar esas tres palabras e que no seu momento fíxose  viral na internet. Oh Long Johnson fálanos do poder que exercen os móbiles e internet sobre a xente hoxe en día. Alude a esa tendencia da vida dixital que leva ás persoas a tentar proxectar por todos os medios unha imaxe de felicidade constante e irreal. Unha temática moi acaída para o momento que estamos a vivir e que cando menos invita a pensar. Reflexións á marxe, o disco está plagado de grandes e moi pegadizos temas dende que arranca da man da canción homónima unha auténtica festa aínda que sexa nos peores momentos, así que a bailar!

Moi relacionado con internet está outra das nosas propostas, os neoiorquinos Vampire Weekend, banda de indie rock que se fixo coñecida por medio de blogs e a rede. Father of the bride (traducido como “O pai da noiva”) é o título do seu tan agardado cuarto álbum que chega despois de 6 anos de ausencia. Chega co seu selo de indentidade sempre recoñecible, un son ecléctico que desborda alegría e desprende luz. Abrimos pista coa espiritual Hold You Now.

Seguimos con  La Marabillosa Orquesta del Alcohol, tamén coñecidos como La M.O.D.A , unha das agrupacións que máis deron que falar durante estes últimos anos onde encandilaron co seu último  elepé Salvavidas (de las balas perdidas), e causaron furor ao longo da súa xira alá onde pisaron. Se algo define a esta agrupación burgalesa despois de pasar por varios discos en castelán e inglés é que acadaron un estilo propio moi marcado sobre todo polo timbre de voz do seu vocalista. La M.O.D.A. erixiuse como unha das bandas que dá voz ao que pensan miles de xóvenes do noso país, xa por iso merecen unha escoita.

Á lista sumamos tamén o xa coñecidísmo Astronauta da artista de Úbeda Zahara recente premio MIN ao mellor vídeo por “Hoy la Bestia Cena en Casa”. Zahara forma parte do elenco de artistas que comparten os seus directos a través de instagram. Nesa rede tamén se move coma peixa na auga David Martínez Álvarez, Rayden,  que no seu traballo Sinónimo conta coa colaboración de artistas coma Pablo López ou Andrés Suarez, entre otros.

Coma sempre aquí vos deixamos a lista ao completo para que a escoitedes con ansia e ganas de bailar. Agardamos que a próxima a compartamos dende a Biblioteca, namentras este é un bo xeito de achegarnos dende as nosas casas ás vosas porque non queremos despedirnos sen lembrarvos #quedanacasa somentes así podemos axudar a reducir a cadea de contaxios.

Budiño – Fulgor,  Amaral – Salto al color, Miriam Rodríguez – Desperté, Two Door Cinema Club –  False Alarm, Vampire Weekend – Father of the Bride  , Taylor Swift – Lover,  Zahara –  Astronauta , Miss Caffeina – Oh long Johnson, Ángel Stanich – Camino Ácido, La M.O.D.A – Salvavida, Andrés Suárez  –  Pequeña Historia, Rosalía – Malamente,  Fredi Leis – Neón, Rayden – Sinónimo, Arce – Pedigrí,  Dios Ke Te Crew – O ciclo da serpe, Disco Las Palmeras – Cálida, León Benavente – Vamos a volvernos locos, Maren Ladson – Maren Ladson, Guadi Galego – O mundo está parado

Lista Reprodución Fórum: os máis prestados do 2019

Non queremos deixar que remate xaneiro sen facer na Lista de Reprodución un repaso polos discos máis prestados ao longo do 2019 na Biblioteca Fórum. Desta volta, penso, a lista non vai deixar indiferente a ninguén , pois o resultado é do máis ecléctico.

O resultado amosa que o que está de actualidade funciona e ten razón de ser. Falamos de Rosalía a flamante gañadora do Grammy ao mellor disco latino de rock, urbano ou alternativo, polo seu álbum El mal querer. Sen embargo o seu álbum debut Los Ángeles é o que figura entre os máis prestados. Se por algo se caracteriza a catalana é polo seu bo facer á hora de mesturar polas raíces españolas co seu interese pola fusión urbana. Dende aquí ben que nos alegramos polo logro aínda que se quedou ás portas do outro premio ao que optaba, o de mellor artista novo que foi a parar a mans da gran triunfadora da noite, a americana Billie Eilish.

 

Moi de preto atopamos aos madrileños Izal. O grupo formado aló polo 2010 son todo un garante de éxito en canto a cheo absoluto nos seus concertos. Iso foi precisamente o que aconteceu en febreiro do 2019 no Coliseum coruñés cando deu comezo a súa xira Autoterapia e onde o grupo fixo cantar e bailar aos máis de 7000 seguidores que encheron as bancadas. Autoterapia é sen dúbida un traballo no que Izal busca profundizar nos sentimentos e aínda que a crítica non os acompañe demasiado acusándoos de frases fáciles non serei eu quen lle reste un chisca do éxito acadado.

E non saimos de Madrid porque tamén temos que falar de Morgan,
O grupo madrileño, que causa sensación entre o público, a crítica especializada e a industria musical, e do que hai un par de semanas poidemos desfrutar do seu directo na cidade. Despois de demostrar en festivais como o Sonorama Ribera ou o Mad Cool, onde tocaron na súa primeira edición como grupo emerxente volverono facer en O Son do Camiño de Santiago de Compostela, nun dos escenarios grandes como banda consolidada. Actualmente atópanse percorrendo de novo o país presentando o seu novo traballo Air, con entradas xa esgotadas en Alacante ou na capital, onde tiveron que habilitar unha segunda data para este decembro.

A lista dos máis prestados complétase con nomes coma o de Xoel López co seu disco Paramales. O álbum encerra unha amálgama de sons que foi absorbendo de todos os lugares que visitou. Un disco arriscado en canto a sons e letras. Pero se nos temos que decantar por unha canción esa é Almas del Norte que soa a que todo é posible. Unha canción “nostálxica”, rebosante de alusións e xogos de palabras, que tenta recuperar o espírito das noites nas que se bailaba ata o amencer.

Ata aquí todo moi na liña, pero o cambio chega con nomes coma o de Mocedades, Gloria Lasso, Los Panchos ou a mesmísima Rocío Dúrcal que acada un dos primeiros postos en canto a número de préstamos. E polo que a min respecta non me pode gustar máis esta mestura de estilos porque isto non é máis ca o fiel reflexo dos gustos musicais dos nosos usuarios e usuarias, e é a eles a quen nos debemos e para quen confeccionamos as nosas listas de reprodución.

Non falta tampouco música máis da terra con artistas do talle de Luar na Lubre, Leilía ou Xabier Díaz. Aquí vos deixamos coma sempre a Lista ao completo que de seguro vos vai seguir sorprendendo. E lembra que todos os discos están dispoñibles para o préstamo, podes consultar antes a súa dispoñibilidade.

Rocío Dúrcal – Por siempre,  Mocedades Antología – Sus 30 mejores canciones, Mamma Mia! – The movie soundtrack…  , Shakira –  Servicio de lavandería, 100 años de bolero –  Vol. 1…, Aquellos maravillosos 50,  Radio Futura  –  Veneno en la piel  , Luar na lubre – Extra : mundi, Leilía – Consentimento  , Carlos Núñez – Mayo longo, Xabier Díaz e Adufeiras de Salitre  –  The tambourine man, Patti Smith – Horses,  Sia – This is acting deluxe edition, Rozalén – Cuando el Río Suena, Rosalía – Los Ángeles,  Iván Ferreiro – Cena Recalentada, Morgan – Air, The Rolling Stones – Grrr!, Izal – Autoterapia, Xoel López – Paramales

Lista Reprodución Fórum: Movember 2019

Novembro é xa todo un clásico na nosa Lista de Reprodución, e é que a causa pensamos que ben o merece. No mes de outono por excelencia chega o movemento Movember que bate récords de ano en ano. Movember é unha organización adicada aos problemas de saúde dos homes e  recada fondos para loitar contra o cancro de próstata, o cancro testicular e os problemas de saúde mental. O obxectivo é recaudar fondos e aumentar a concienciación sobre a saúde do home, explican dende a web de Movember.

A súa historia remóntase ao ano 2003 cando un grupo de mozos decidiron deixarse medrar o seu bigote para apoiar a un amigo enfermo de cancro. Ao ano seguinte, a fundación creada por eles mesmos empezou a recadar fondos. En 2007 conseguiuse chegar á cantidade de 22 millóns de dólares australianos en doazóns. Actualmente, e desde o seu inicio, calcúlase que se xerou unha recadación de 650 millóns de euros, chegando a 5 millóns de seguidores e doantes e logrando máis de 1000 programas de axuda á investigación.  Á iniciativa tamén se poden sumar mulleres (Mo Sistas) que axuden aos seus compañeiros (Mo Bros) a deseñar o mostacho. Pero se algo está conseguindo Movember, é sensibilizar sobre os cancros de próstata e testículo.

Na Lista de Reprodución de Novembro facemos coma sempre o noso particular “movemento november” e seleccionamos música feita por homes teñan ou non bigotes.

Tyrannosaurus Hives é o título do terceiro álbum da banda sueca de garage rock The Hives. O traballo chegou despois de catro anos de espera, despois de ter que regravalo ao non quedar satisfeitos co resultado do primeiro intento. Aínda que as críticas sobre este traballo non foron de todo positivas, o certo é que os suecos fánnolo pasar ben e bailar!

E de Suecia viaxamos a EEUU da man de Bruno Mars. O álbum Unorthodox Jukebox, ten influencias de pop-soul, jazz, funk, disco… As súas cancións son caracterizadas polo estilo habitual de Mars de compoñer melodías e arranxos, e aínda que a súa composición explora temas como o amor, o desamor e relacións, Unorthodox Jukebox incorpora letras e temas máis explícitas que no seu álbum anterior, como o sexo, vinganza, a ira e o chauvinismo.

En Nova Iork quedamos para escoitar a Lenny Kravitz pero non por moito tempo xa que os seus fans están de noraboa pois está previsto que ofreza un concerto na nosa cidade dentro da súa xira española. Deste  cantante, actor, compositor, multiinstrumentista e productor pouco hai que dicir que non se saiba. Gañador do Grammy “Best Male Rock Vocal Performance” catro anos seguidos, estar entre os artistas mellor valorados dos “100 mellores artistas de Hard Rock” e unha chea de hits musicais que o acompañan dende os seus comezos.

Debilidade persoal de quen escribe son os británicos Mumford & Sons quen nunha entrevista a comezos de ano á revista Mondo Sonoro declaraban sentirse máis vivos ca nunca. Aínda que parece que o seu último disco Delta non deixou tanta pegada coma Sigh No More (10) ou Babel (012). No seu último traballo pasan dun son profundamente folk que nos teletransportaba ás camisas de cadros e a unha granxa típica americana a un son máis rock, máis de masas. Na Lista de Reprodución de momento quedamos con Babel.

Aquí coma sempre deixámosvos a Lista ao completo para que a desfrutedes e por suposto non esquezades comprobar a dispoñibilidade dos discos no noso catálogo para podelos levar en préstamo.

Andrés Calamaro – ’81-‘91, Joaquín Sabina – Vinagre y rosas, Elvis Costello – National Ramson, AC/DC –  Powerage, Manu Chao – Radio Bemba Sound System, Ray Charles – Genius Loves Company,  Rod Stewart – The Great American Songbook, Mago de Oz –  Mago de Oz, Leiva  –  Pólvora, Duncan Dhu – Piedras, The Hives –Tyrannosaurus Hives, Jimi Hendrix – Jimi Hendrix,  Santana – Santana 2, Raphael – Raphael para todos, Ryan Adams – Gold,  Mumford & Sons  – Babel, Bruno Mars – Unorthodox Jukebox, George Michael – Twenty Five, Lenny Kravitz – Black And White America, Xurxo Souto – Fumareu.

Lista Reprodución Fórum: é tempo de festivais!

Xa metidos de cheo no verán a oferta de concertos e festivais é moita e moi variada, por iso na Lista deste mes facemos unha pequena selección dos artistas máis destacados que tocarán tanto na cidade dentro do Noroeste Estrella Galicia coma daqueles que pasarán polas principais vilas e cidades da comunidade.

O Noroeste Estrella Galicia que se celebra na nosa cidade do 6 ao 11 de agosto é unha das propostas máis completas do verán. Este festival é singular e converteuse en referente porque nos últimos anos expandiu os seus escenarios por distintos puntos da cidade, como o castelo de San Antón ou o Paseo das Pontes. Todo un luxo para a cidade, que ademais é gratuíto. O bombazo da edición deste ano será a cantante Patti Smith, coñecida como a madriña do punk. Esta veterana lenda da música actuará na praia de Riazor o 9 de agosto. A cantante, aclamada por éxitos como People Have the Power, Gloria e Because the Night, ofrecerá o seu directo a partir das 23.30 horas, no que é ata o momento o seu único concerto gratuíto confirmado en España.

Ketama, Mala Rodríguez, Susana Seivane e Tequila abrirán, pola súa banda, as Festas de María Pita da Coruña na primeira semana de agosto.
A banda dos Carmona actuará na praza, nun concerto gratuíto ao aire libre, o propio 1 de agosto, xusto despois do pregón que inaugurará as festas. Ao día seguinte, tamén dentro do ciclo de concertos nocturnos As noites de María Pita, será a rapera Mala Rodríguez a que se suba ao escenario. E a primeira semana de festas pecharase coa gaiteira Susana Seivane, que actuará o sábado 3, e todo un clásico do rock en español, Tequila, que estará en María Pita o domingo 4.

Os concertos e festivais exténdese por toda a comunidade con infinidade de plans e non poderiamos enumeralos todos: O Sinsal na Illa de San Simón do 25 ao 28 de xullo, o Atlantic Fest na Illa de Arousa (Pontevedra) do 26 ao 28 de xullo, Son Rías Baixas en Bueu (Pontevedra) do 1 ao 3 de agosto, O Marisquiño en Vigo do 9 ao 11 de agosto, etc. Pero non marchamos sen destacar unha cita de carácter solidario que se encarga de pechar o circuíto de festivais galegos cada verán. Trátase do Festival da Luz, que reúne a miles de persoas na pequena localidade de Boimorto, na Coruña. Cada ano esgótanse os abonos, que ten un prezo moi alcanzable debido a que a recadación íntegra destínase a obras benéficas. O festival organizado por Luz Casal traerá este ano entre outros a Mikel Erentxun, Arizona Baby, Celtas Cortos e Amparanoia.

E se queredes ir aos concertos coas cancións ben aprendidas non esquezades pasarvos pola biblioteca e levar os discos en préstamo que xa vos están agardando. Podes consultar a súa dispoñibilidade no noso catálogo.

Para non perder o tempo escoita a Lista ao completo aquí, agardamos que vos guste e vos anime a non quedar na casa este verán porque os festivais agárdanvos!!

Tom Jones – Reload. Revolver – Sur. Tequila – Rock and roll. Patti Smith  Horses. Antonio Carmona – Vengo venenoso. Ketama – Konfusión. Xosé Manuel Budiño – Home. Susana Seivane – Susana Seivane. Mala Rodríguez  Malamarismo. Anni B Sweet – Start restart undo. Fangoria – El paso trascendental del vodevil a la astracanada. Raphael – Te llevo en el corazón. Banda Crebinsky – Jet lag. Los Punsetes – Una montaña es una montaña. Ariel Rot – La huesuda. Vetusta Morla – Los ríos de Alice. León Benavente – León Benavente. Leiva – Pólvora. Bon Jovi – This house is not for sale. Escuchando Elefantes – Hope. 

Lista Reprodución Fórum: Os clásicos nunca pasan de moda

Co ciclo temático “Un libro, unha pegada”, que se desenvolve durante o segundo trimestre do ano 2019 na Biblioteca Fórum Metropolitano, queremos destacar a importancia que ten a literatura clásica na cultura actual. A súa influencia é múltiple: repercute no cine, na arte, no teatro e nos escritores e escritoras actuais.

Na Lista de Reprodución de Fórum queremos ir da man porque pensamos que os clásicos nunca pasan de moda, así que  facemos recopilatorio de artistas que na súa época deixaron pegada e actualmente seguen marcando.

Comezamos coa banda de orixe irlandesa U2 formada no ano 1976 por Bono, The Edge, Adam Clayton e Larry Abrandan Jr. A banda alcanzou tal nivel de fama que a súa xira 360° Circuíto converteuse na xira máis exitosa de todos os tempos.

Tom Jones é unha lenda da música que vendeu máis de 100 millóns de discos. Iniciou a súa carreira na década dos 60 do pasado século e logrou éxitos mundiais como “ It’ s Not Unusual” e “ Delilah”. Nos últimos anos a súa carreira experimentou un novo repunte, sobre todo desde a versión que gravou do tema “Kiss” de Prince.

 

Un icono é xa a querida e admirada Amy Winehouse, que dende a súa tráxica morte moitas foron as persoas que quixeron imitar o seu característico son pero hai artistas que son inimitables e Amy Winehouse foi un deles. Viviu apenas 27 anos pero a súa influencia real sobre o mundo aínda se está empezando a sentir agora. Amy Winehouse foi, primeiro que todo, unha gran escritora de cancións, sempre contaba historias novas e orixinais.

Durante a pasada década , Bon Jovi empezaron a converterse nunha das máis grandes bandas de rock. A este punto, Jon Bon Jovi, como frontman do grupo, conseguiu ser unha das caras máis famosas de Estados Unidos, sendo invitado a numerosos eventos de carácter privado, como entrega de premios, ceas na Casa Branca, etc. Á marxe da polémica de quen leva as rendas do grupo, Bon Jovi seguen coa boa música facéndonos bailar, cantar e vibrar sentindo a súa música.

E se falamos de clásicos na nosa lista non podiamos deixar pasar ao gran Michael Jackson que se converteu no Rei do Pop, non polas vendas millonarias dos seus discos, nin por todos os récords que rompeu unha e outra vez. Converteuse nunha imaxe influínte porque estivo adiantado á súa época, non imitou a ninguén se non que foi quen de crear unha estética definida ao redor da súa persoa.

A lista segue e podedes escoitala ao completo aquí e por suposto pasarvos pola biblioteca para levar os CDs en préstamo.

Luís Miguel – Segundo Romance. Julio Iglesias – Crazy. Raphael – De amor & desamor. Amy Winehouse –  Lioness: Hidden Treasures. Areta Franklin –  The very best…. The Beatles – Sgt. Pepper`s Lonely Hearts Club Band. Prince & The New Power Generation – Diamonds and Pearls. Michael Jackson – Dangerous.  Van Morrison – Days Like This. Tom Jones – Gold. Bon Jovi – The very best.  Ray Charles – Kiss me Baby. Celia Cruz – Legends. Paco de Lucía – Luz.   U2 – No Line On The Horizon. David Bowie – ChangesBowie. Donna Summer – The Journey, The very Best of Donna Summer. Perales – Calle Soledad. Víctor Manuel – Vivir para cantarlo.Elvis Presley – Classic Billboard Hits.

Lista Reprodución Fórum: As mulleres na música

Se algo caracteriza ao mes de marzal é o día  8 de marzo, Día Internacional da Muller.  No noso blog musical queremos celebrar de forma específica esta data de relevancia, non é efeméride calquera, adicando a Lista de Reprodución ás mulleres coraxe que encheron e enchen a música de voces femininas con moito que dicir e berrar.

Pouco a pouco, e coma en case tódolos ámbitos, e con moitos esforzos a muller adquiriu unha respetable posición na sociedade musical. Aportou a súa creatividade e o seu talento en diferentes estilos musicais ata chegar sen darse apenas conta a ser líderes de bandas de rock ou a convertirse en conocidísmas instrumentistas por exemplo.

A lista de mulleres destacadas dentro da música seria moi longa asi que na Lista de Reprodución da Biblioteca Forum Metropolitano tan só deixamos unha pequena escolma que abrangue diversos xéneros musicais e diferentes épocas.Pero sobre todo queremos resaltar as voces de mulleres galegas.

Comezamos cunha gaiteira de excepción e que precisamente está de aniversario sobre os escenarios Susana Seivane 1999-2019, de quen os coruñeses poidemos desfrutar o pasado mes de febreiro dun concerto especial 20 aniversario na sala Garufa.

FA, o seu último traballo tras oito anos de silencio discográfico,  opta aos Premios da Música Independente na categoría de mellor álbum de músicas do mundo e fusión. FA (Fiz e Antón os seus fillos) é unha profunda introspección no mundo da maternidade, os convencionalismos, a familia e a plenitude persoal. Sen perder a súa esencia definitoria, Susana explora novos ritmos imprimindo modernidade na tradición e erixíndose como unha das máis virtuosas gaiteiras de todos os tempos.

O fenómeno musical da actualidade en Galicia é Sés, cun club de fans xuvenil incluído e milleiros de seguidores nas redes sociais. Forza, enerxía e carisma acompañados dun discurso sen pelos na lingua. Neste mes de marzo sae tamén á venda o seu novo disco que presentará entre outras datas o día 15 no teatro Rosalía. A “RABIA AO SILENCIO” que cantaba Yupanki dá nome a este traballo composto por unha escolma de cancións populares, folclóricas ou de autor, mais todas elas ligadas a un pobo do que manaron e ao que nutriron. Sés, proponnos desta volta un traballo acústico, máis íntimo e directo do que nos ten acostumados.

Da seguinte voz tamén poderemos desfrutar ben prontiño, desta volta compartindo escenario con Pablo Castaño Quartet feat dentro da programación Estación de Jazz A Coruña 2019 coa presentación do disco A-la-láa. Ugia destacou entre outros proxectos por ser a versátil vocalista de Marful, un grupo cuxa seña de identidade era sobre todo a música do  futuro, en palabras da propia Ugia “música popular galega urbana” que supuxo camiños distintos, nunca percorridos pola música galega. Pero sobre todo, Ugía é unha muller decidida e vital, que transmite enerxía en estado puro e en cada ollada.

Aínda que penso que xa non queda moito por dicir dela, non podiamos deixar sen mencionar a Guadi por quen temos unha especial debilidade. Primeiro con Berroguetto, despois formando alianzas fermosas de pequeno formato  (Espido, Nordestinas) e finalmente tamén en solitario, Guadi é hoxe unha voz imprescindíbel na nosa música, con presenza e referencialidade alí onde participa. Das súas benditas “Lúas de Agosto e Setembro” xa falamos longo e tendido neste post.

E pechamos o pequeno pero intenso recorrido con Silvia Penide e Carla López e co seu espectáculo Feminino Plural onde fan unha homenaxe ás mulleres autoras ao longo da historia. O percorrido que nos presentan está repleto de historias contadas e cantadas, de voz e música, e reflicte o magnífico patrimonio que nos deixaron as autoras universais que tantas veces permaneceron en segundo plano. Unha viaxe para descubrir, recoñecer, valorar e gozar con elas e por elas. Poderemos desfrutar da delicia do seu directo o próximo 14 de marzo na Biblioteca Forum.

A lista ao completo podedes escoitala aquí, e non esquezades consultar o catálogo para ver a dispoñibilidade dos discos que podedes levar en préstamo.

Aid – Rapoemas. Guadi Galego – Lúas de Outubro e agosto. Silvia Penide – Invisible. Susana Seivane –  Susana Seivane. Marful –Marful. Dulce Pontes – Pereginaçao. Alba María – Aínda  . Chavela Vargas – Antología.  Pasión Vega – Flaca de amor. Patti Smith – Horses. Florence + The Machine – How Big, How Blue, How Beautiful.  Björk – Debut. Adele – 25. Sés – Opoñerse á extinción.   Leilía – ConSentimento. Uxía – Eterno navegar. Estrella Morente – Mujeres. Nina Simone – The Greatest Hits. Diana Krall – Wallflower. Norah Jones  –  High Violet

Lista Reprodución Fórum: Os mellores do 2018

Como cada comezo de ano toca facer balance e se a prensa especializada se fai eco do mellor do 2018, nós non iamos ser menos e facemos tamén recopilación dos mellores artistas dos que contamos cos seus discos.

A lista de discos nacionais que valen a pena é extensa pero é evidente que 2018 foi o ano de Rosalía.  El mal querer (2018) eríxese neste exercicio en número un por unha avalancha de votos. Composto pola cantante e co-producido xunto a El Guincho, o disco presenta un son distintivo e único que mestura as influencias do flamenco clásico da súa herdanza con sons urbanos modernos.

Na Biblioteca contamos co seu anterior traballo Los ángeles (2016-2017) que foi sexto mellor disco nacional para Mondo Sonoro.O obxectivo de Los Ángeles, segundo comenta a moza catalá de vinte e tres anos, pasaba por render unha homenaxe ao flamenco. Con Los Ángeles, Rosalía postúlase como a cantaora contemporánea que mellor entendeu os tempos que corren: capaz de colaborar con C. Tangana.

Seguimos coa lista dos nacionais e seguimos con letras en maiúsculas porque falamos de Zahara. A artista de Úbeda consegue manter a súa esencia pese a unha clara evolución de son. O cambio xa se aprecia con Santa (G.O.Z.Z., 2015) pero culmínao con Astronauta,  un traballo coidado ata o máis mínimo detalle. Acanción máis coñecida do disco é Hoy la bestia cena en casa pola súa recente condición himno feminista. Zahara xa conquistou España cunha dobre cita na sala madrileña, La Riviera na que presentou o seu último álbum con dous sold out nos que se coroa como unha das cantautoras de máis éxito no noso país.

Na nosa lista recordamos Con las ganas, do seu primeiro disco La fabulosa historia de …

O seguinte artista do que falamos, non exento de polémicas, poidemos desfrutalo recentemente na cidade, nun concerto o pasado mes de decembro no Teatro Colón. Falamos de El niño de Elche, cantaor multidisciplinar e exflamenco, que soubo xuntar nas súas variadas propostas artísticas xéneros ou disciplinas como o flamenco, a electrónica, a literatura, a performance, a poesía fonética, o rock, a canción de autor ou a música contemporánea, entre outras. Indifirente non deixa a ninguén co seu último traballo Antología del cante flamenco heterodoxo. Como o seu propio nome evidencia, isto non é un disco, senón unha “antoloxía”. El niño de Elche volve poñer o flamenco patas para arriba nesta antoloxía  heterodoxa de 27 pezas que  reinventan os distintos paos do xénero. Saetas,  fandangos, tanguillos… transfórmaas en “crebacabezas sonoros” coa axuda da electrónica, o descaro do rock e a personalidade da canción de autor. Dentro do mellor dos discos internacionais falamos de “7” o sétimo álbum de estudo da banda estadounidense Beach House , lanzado o 11 de maio de 2018, a través de Sub Pop. “7” recibiu aplausos dos críticos musicais, que eloxiaron a natureza aventureira do disco e a consistencia da banda, con algúns chamándoos o mellor álbum do dúo ata a data. Se ben é certo que Beach House é un deses grupos que se caracterizou sempre por ter máis conexión coa crítica ca co público maioritario da música alternativa. Pero sexa como for, “7” segue soando a Beach House pero o compoñente electrónico neste traballo é moito máis evidente ca en álbumes anteriores.

Na Lista incluimos Bloom, o cuarto álbum de estudo do dúo, lanzado no 2012 que foi clasificado por moitos críticos como un dos mellores álbumes do ano.

Os ingleses Artic Monkeys meténse tamén na lista. Despois de cinco anos na sombra chegan con Tranquility Base Hotel & Casino. Considerada unha das bandas máis importantes do rock alternativo británico, o de Artic Monkeys é un dos regresos máis esperados. No seu último traballo o grupo liderado por Álex Turner prescindiu da vea máis rockeira que os caracterizou máis de dous lustros. A evolución do seu son derivou nunha gama máis coidada e tranquila, chegando incluso a prescindir das guitarras algo que non gustou a todos. Para outros a evolución foi mellor recibida chegando incluso a comparalos con David Bowie.

Isto foi só un aperitivo, a lista segue, deixámosvola aquí ao completo, e non esquezades pasar pola Biblioteca Fórum para poder desfrutar dos discos ao completo.

Mala Rodríguez –Malamarismo. Novedades Carminha – Juventud infinita. Niño de Elche  –  Antología del cante flamenco heterodoxo  . Zahara – La fabulosa historia de …. María Rodés – Una forma de hablar. Rosalía – Los Ángeles.  Sés – Opoñerse á extinción . Rozalén – Cuando el río suena.  Russian Red & Depero – Perfect Time. Nacho Vegas – Resituación. Queens of the Stone Age – Like Clockword.  Artic Monkeys –  Whatever people say I am, that´s what I´m not. Andrés Calamaro – ’81-’91. Eminem – The marshall mathers LP.   Van Morrison – Days like this. Christina Rosenvinge – Foreign land. Beach House – Bloom. Mark Lanegan Band – Blues Funeral. The National  –  High Violet. Mumford & Sons – Babel