#EscoitaenGalego

Baixo o lema “Letras Galegas 2023: Sinte en galego“, as Bibliotecas Municipais da Coruña convidamos á veciñanza a sentir en galego, organizando diversas actividades durante toda esta semana onde o galego é o epicentro da festa.

As bibliotecas visibilizamos o compromiso coa lingua e a literatura, non só nos libros. Este ano na Biblioteca Fórum as mostras bibliográficas que conmemoran este día fan especial fincapé na música en galego.

Ademais de poder levar os discos en préstamo podedes botar unha escoita a parte desa selección de música en galego a través da nosa canle de spotify.

Na escolma podes atopar música de raíz, como é o caso de “Levantarse e caer” o traballo en solitario de Xabier Díaz, paralelo ao seu traballo xunto a Adufeiras de Salitre, no que afonda nos conceptos de resiliencia, os impactos sociais que recibimos como individuos na infancia e a súa importancia na posterior construción individual e colectiva. Reflexiona sobre o paradigma do éxito, etc. Todo desde unha perspectiva intimista e personalísima, mirando á infancia sen perder de vista o presente.

Xabier Díaz – Levantarse e caer

“Diluvio” co que as Tanxugueiras recén veñen de gañar os premios  ‘Mellor Album de Música de Raíz’  e ‘Mellor Album en Galego’ nos premios españois da música independente Os Premios MIN son un recoñecemento á música independente en España. O seu nome provén das siglas de “Música Independente”. Estes premios celébranse anualmente e buscan destacar o talento e a calidade dos artistas e proxectos musicais independentes en diferentes categorías.

Tanxugueiras – Fame de Odio (Videoclip Oficia)

Baixo o selo da Editorial Galaxia e co título de Rapoemas podedes escoitar textos da poesía galega clásica levados pola  voz e  ritmo hip hop da cantante viguesa Aid.

Castellanos de Castilla, por Aid (Rapoemas)

Dentro da selección incluímos tamén a, unha das bandas máis emblemáticas do hip hop galego, os Dios Ke Te Crew que están de xira para celebrar o seu vixésimo aniversario e o pasado 18 de marzo pasaron pola Coruña. Na nova xira que leva por título “Tremendos Anos 20”, os de Ordes revisan as súas últimas creacións e, moi especialmente, os grandes éxitos da súa traxectoria.  Desta banda destacamos dous puntos clave na súa carreira: por unha banda a publicación de Xénese no 2006, que vos fixo coñecidos en todo o país e que se converteu no primeiro disco da historia do rap en galego, e pola outra gañar o Premio Martín Códax da Música na súa primeira edición no 2013 na categoría de Hip-Hop e músicas urbanas.

Dios Ke Te Crew | OG | feat. Boyanka Kostova

Aquí podedes escoitala ao completo e somos todo “orellas” se queredes facernos as vosas recomendacións para ir ampliándoa!!!

Falamos con Leria, a banda coruñesa gañadora do “Novos Valores” 2023

Leria, son unha banda de indie pop coruñesa formada por catro mulleres de 19 a 24 anos e que o xurado do VII concurso Novos Valores 2023 do Festigal escolleu como banda gañadora. As súas integrantes, Mayra, Helena, Andrea e Itziar, serán as encargadas de abrir o Festigal o vindeiro 24 de xullo.

Fotografía tomada do instagram de Leria

Dende Bibliosons quixemos coñecelas un pouquiño máis polo miúdo ademais do que sabiamos delas polo que reza a súa biografía web:

Leria comeza nas rúas de A Coruña, con May e Hele.Tras un bolo en acústico, con caixón e guitarra… entendemos que esto funciona e queremos e necesitamos axuda. É entón cando aparece Itzi nas nosas vidas como baixista do grupo e un tempiño despóis, incorpórase Andrea.

No ano 2022 tocamos en varias salas de Coruña, unha delas a Mardi Gras (3 veces).É en Agosto cando debutamos nun escenario grande, o do festival “ROCK IN CAMBRE”E esa é a nosa historia breve e concisa.

Fotografía tomada do instagram de Leria

Máis eu o dato que recalco é o que podemos ler na súa conta de instagram Tocando polas rúas de A Coruña.Indie pop en galego.

B. Así que a pregunta é case obrigada, parece indiscutible o auxe que está a vivir a música en galego, pero vós como decidistes facer esa aposta?

A verdade é que apetecíanos cantar neste idioma. Parécenos unha lingua fermosa para cantala  cunha sonoridade impresionante. E ademáis,  sentimos que a lingua galega está como asinada a un estilo como é o folclore e non é así.

B. E en relación coa pregunta anterior, como é o proceso creativo para as novas cancións? Individual, en grupo a lume lento, rápido…

Xeralmente partimos dunha idea que trae algunha das miembros do grupo. Ás veces intentamos comezar algo xuntas, depende un pouco da inspiración.

B. Enmarcadas dentro do indie pop, cales son os vosos referentes? que tipo de música acostumades escoitar?

Acostumamos escoitar iso, aínda que en realidade escoitamos de todo un pouco.

Temos como referentes a Ginebras no tema facer música para pasalo ben, dar un show entretido . Pero encántamnos outros artistas como Xoel López, Sidecars, Ede,… pero cada unha individualmente ten os seus gustos diversos jajaja.

Videoclip oficial LERIA – Queres ir a bailar?

B. O ano pasado tocastes no Rock in Cambre, como foi a experiencia? Xa podedes dicir se sodes máis de festival ou de sala pequena? 😉

A verdade é que é un pouco cedo para dicir o que preferimos , xa que así nun escenario tan grande só estivemos esa vez. Pero sempre é guai poder moverse sen darlle á compañeira no ollo.

 Este 24 de Xullo que imos ao Festigal, e poderemos confirmar que os escenarios grandes molan máis.

B. Agora mesmo andades metidas de cheo na programación das sesións vermús polos barrios da cidade que durarán ata maio, como está sendo a acollida por parte do público?

En xeral, ben. Tamén é verdade que non é o mesmo un público que vai verte a ti que un público que foi tomar un vermú e atopouse contigo. Pero quen intenta desfrutar da nosa música sempre ten boas palabras para nós.

B. Como se presenta este verán?

Cargadiño de cousas a verdade. Non podemos dicir moito, pero quen queira ir vernos , terá a oportunidade seguro.

B. E xa para rematar, que lle diriades ao público máis novo que aínda non vos coñece, que vai atopar na vosa música?

Que se anime a escoitarnos, que cremos que temos un directo para pasalo ben e para todo o mundo.Na nosa música vai atopar boas vibras, estrousos pegadizos e a catro tías  chulísimas aos mandos dunha banda, que a día de hoxe tampouco é tan común ver nun escenario.